Desde cu Gobierno di Aruba a cuminsa flexibilisa e medidanan di prevencion pa Covid-19 p’asina economia cuminsa draai poco poco, ta importante pa trece dilanti cu mester sigui cumpli cu medidanan di distanciamento social. Pero manera nos a wak na varios luga y den varios manifestacion, ta parce cu pueblo a lubida di cumpli cu normanan di prevencion cu tanto biaha a wordo scucha.

Bon Dia Aruba a haci un entrevista cu anestesiologo Dr. Israel Posner, ken a splica cu e tin impresion cu ta casi imposibel pa mantene distancia social, ya cu hopi hende no ta respeta. No solamente nan, sino cu si un persona su mes kier cumpli cu distanciamento social, e ta haya cu e otronan no ta coopera.

Un ehemplo di esaki ta e manifestacionnan cu a tuma luga siman pasa, barnan, restaurant y otro luganan cu aglomeracion di hende cu no ta cumpliendo cu loke Departamento di Salud Publico y Gobierno di Aruba a keda ripiti tanto biaha den e tempo aki, pa comunidad por mantene distancia social, laba man y haci uso di mondkapje, pa asina evita e plamamento di Covid-19.

Posner a trece dilanti cu hopi hende no ta wak e importancia di distancia social. Loke mester realisa y tene na cuenta ta cu economia ta e unico cos cu Aruba tin te aworaki y e cos mas importante sigur ta turismo. Frontera tin cu habri pa tur hende por bin Aruba, “e pregunta ta con nos ta haci esey. Pasobra hopi hende ta pensa cu un par di hende ta bira malo y un par di hende so ta muri, pero den mi opinion, asina e cos no ta bay”, el a declara.

Posner a bisa cu na dado momento ta berdad cu lo haya cu algun hende lo muri, y tambe ta berdad cu e hende ta bay ta malo den hospital; por ta no solamente un persona sino hende rond di dje, famia di dje, por ehemplo su tata, pero tambe por ta un turista. Y tambe ta berdad cu si Gobierno di Aruba kier habri pa turistanan bin Aruba, ademas di tur paso cu nan a tuma pa purba di haci esaki di un forma mas sigur posibel, si ciudadano no ta haci su parti como un persona cu ta cuida Aruba, ‘nos ta bay haya cu tur e paso cu a wordo tuma ta ‘en vano’’. “Pasobra no ta realisa cu cada 20 minuut e virus aki ta bira dobel den cantidad”, el a comenta.

Di e manera aki, el a confirma cu mas hende lo bira malo esaki por hasta conduci na Aruba hayando un malo nomber. Pa motibo cu e hende na Aruba lo ta muriendo ya cu nan no por cuida nan. Di e manera aki Posner a trece dilanti cu no ta hopi pa pidi cu pueblo mantene distancia, laba man, haci e cosnan cu ta necesario, ya cu na momento cu por haya un otro lockdown cu negoshinan tin cu cera, e prijs cu nos paga lo ta hopi mas halto.

“Ta un tiki di cosnan cu nos tin cu haci, pero nos tin cu haci’e. Pero e hende no ta worry” Posner a menciona.

Tambe el a manifesta cu e ta atende pashentnan cu tin cancer of algun cu tin cu ta dialisa, cu nan tin un sistema inmunologico cu ta abou. E mes como dokter ta purba di tene distancia social, ‘pero algun di nan no kier tende y no ta yuda’, Posner a expresa.

Di e manera aki, el a splica cu ora un persona ta usa su mondkapje, mester corda cu e no ta cuidando su mes so, sino cu ta cuidando e otro. “E ta algo cu no ta leuk, un mondkapje ta hopi fastioso ta berdad, pero esey kiermen cu abo mes ta tumando riesgo.” Ademas el a afirma cu ‘tin hopi hende cu ta muri di hamber pa via Covid-19 y esey ta haci mas dolor cu un mondkapje’, Posner a señala.

Di mesun manera, el a sigura cu Aruba a haci un tremendo trabou, pa motibo cu tin masha poco hende cu a haya e virus compara cu loke e por ta. Un bon trabou pa por ‘flatten the curve’, pero e problema ta cu e parti facil tabata pa cera hende. Pero asina cu no tabatin virus mas, e personanan a sali pa come, pa bebe, pa disfruta ; loke hopi hende no sa ta cu e virus aki ta 10 biaha mas potente y mas sabi.

Pa finalisa, Posner a expresa: “Por fabor laga nos yuda otro. Si abo wak mi cu mi no tin mi mondkapje bisti of mi no tin suficiente distancia social, corda mi, exigi mi pa mi por fabor bisti e mondkapje y laba man.” Si un persona ta haci’e lo no rabia, pa motibo cu mester ta agradecido; si un persona no por haci esey, miho keda cas y evita sali tuma riesgo y infecta otro hende.