Diasabra ultimo Nicaragua a anuncia cu e pashentnan cu Covid-19 lo ricibi tratamento cu hydroxychloroquine cu India a duna Nicaragua, un remedi cu ta pa tratamento di malaria y cu segun varios pais y Organisacion Mundial di Salud (WHO) mes a determina, e no ta aporta beneficionan contra e Covid-19.

Gobierno di presidente Daniel Ortega a haci e anuncio, a traves di Ministerio di Salud, cu a publica e informacion den medionan estatal y oficialista, despues di haya e donacion di medicamento aki for di India.

“Gobierno di Nicaragua, a traves di Ministerio di Salud (MINSA), a ricibi di parti di Republica di India e prome cargamento di tratamento pa detene e coronavirus, loke ta consisti di e cantidad di 170.000 pildo di hydroxychloroquine”, autoridadnan a indica.

Ya no ta aplicandohHydroxychloroquine na pashentnan di Covid-19 desde juni ultimo na paisnan como Spaña, Merca of Reino Uni.

Organisacion Mundial di Salud (WHO) tambe a anuncia e abandono definitivo di nan test cu e medicamento aki, despues cu varios estudio a determina cu no ta aporta ningun beneficio clinico den e pashentnan interna na hospital cu Covid-19.

Esaki no ta e prome remedi cu cual Nicaragua ta purba di enfrenta e pandemia di coronavirus. Na luna di maart pasa nan a adkiri un cantidad no conoci di Interferon Alfa 2B for di Cuba.

Gobierno Nicaraguense, cu e mesun luna a anuncia su interes pa produci un vacuna contra Covid-19 a base di Interferon Alfa 2B, te awor no a wordo informa si nan a aplica e remedi aki pa pashentnan cu Covid-19.

Den su ultimo rapport di e pandemia, emiti 30 di juni pasa, Ministerio di Salud a reporta cu e pais a alcansa e 2.519 caso confirma di Covid-19, cu 83 morto. Di su parti, e independiente Observatorio Ciudadano Covid-19, componi pa un red di mediconan y boluntarionan, a informa cu 7.402 sospechoso y 2.087 morto, di e cual 133 tabata di neumonia y 1.954 pa otro sintomanan di enfermedad.

 

LEAVE A REPLY

Please enter your comment!
Please enter your name here