Dr. Lili Beke-Martinez : “Nos semper a traha cu amor y cariño pa nos pashentnan”

lilly bekker servicio dokter.jpg

Entrante mañan, Dr. Lili Beke-Martinez no lo continua su relacion cu AZV como dokter di Cas.  Pero e lo sigui  traha como dokter den su mesun consultorio brindando su practica priva.

Encuanto pa kico e no a sigui su relacion cu AZV como dokter di cas, el a bisa cu cada compania tin su ideologia. E contracto di AZV ta anualmente y nan ta dicidi si nan ta renoba si of no pa cierto tempo. Pero el a indica cu aworaki a yega na e momento di un acuerdo cu e no lo sigui mas cu AZV. “Pa mi esey no ta problematico den sentido cu ami semper ta un hende cu a traha cu practica priva”, el a bisa.   

Dr. Beke a cuminsa como dokter di cas na 1979.   Dos aña el a traha na hospital prome y despues el a cuminsa su practica priva como dokter di cas. Despues el a drenta den politica y el a asumi e funcion  di Minister di Salubridad pa casi 8 aña,  y despues el a sigui eherce su trabou como dokter di cas, y e lo sigui haci esey como un practica priva.

Relacion cu pashent

El a declara na Bon Dia Aruba cu e sentimento  ta mixto, ya cu e ta despedi di hopi pashent cu pa aña el a brinda su servicio como dokter di cas, y ora cu nan ta bin dispidi di dje e ta sinti cierto nostalgia. Tambe su team di personal cu semper a duna lo maximo  pa atende nan pashentnan.

Pero di otro banda e lo continua  brinda su servicio priva pa esun interesa pa haya conseho of segunda opinion.  Tambe cu empresanan  cu e tin un relacion profesional cu nan  pa haci control na nan trahadonan.  Tambe e ta ofrece su servicio den e sector turistico, y e lo sigui cune. Semper durante su carera el a ofrece e tipo di conseho medico aki.

Ta un motibo di satisfaccion pe cu nan pashentnan ta aprecia e tempo cu el a dedica na nan pa tanto añanan. Pero di  otro banda no ta facil pa e por bisa su pashentnan ayo. “No ta asina cu nos ta bay, nos ta keda den realidad. Unicamente ta cu mi no ta traha mas cu AZV”, el a bisa. E ta spera cu su pashent afilia na AZV lo por sigui haya e mesun servicio y e mesun atencion medico cu nan semper a duna na nan.

“Nos semper a traha cu amor y cariño pa nos pashentnan”, el a declara. Semper el a percura pa saca tempo y asina atende nan y duna nan un palabra di apoyo.

Burocracia y bahamento di gasto

Aunke su satisfaccion ta grandi como dokter di cas, Dr. Beke  ta haya cu e parti menos agradabel ta e burocracia cu como dokter di cas nan tin cu confronta cune.  E parti burocratico ta consumi hopi tempo, y el a purba di evita esey durante oranan di trabou pa no afecta e atencion cu su pashentnan ta merece.  “Pa mi e pashent ta primordial”, el a afirma.

Otro aspecto tin di haber cu e limitacion cu como dokter di cas  e ta confronta di parti di seguro AZV pa cu nan pashent, caminda nan a haya hopi desaroyo den e maneho pa reduci gasto.  Tin biaha como dokter e ta lamenta e situacion aki, ya cu un pashent por wordo beneficia cu un tratamento specifico mas avansa, pero no semper esey ta posibel. “Cosnan asina ta e dolor di cabes”, el a expresa na Bon Dia Aruba. E ta un situacion nada facil ya cu como dokter di cas nan tin cu atende cu e pashent hopi frustra.

Salubridad publico ta keda un preocupacion grandi pasobra e ta observa cu mas y mas e limitacion cu ta existi pa e profesional medico por funciona debidamente. E limitacion aki tin di haber cada biaha e espacio pa duna un atencion maximo na e pashent, ta bira mas chikito ya cu nos tin un seguro medico general cu ta sigui reduci gasto riba e tereno aki.  Menos mal –segun Dr. Beke- cu e pashent por haya un seguro adicional cu ta duna nan mas posibilidad pa nan salud.

“Esey ta e problema semper di burocracia y ora bo tin un seguro general medico den monopolio, bo ta haya e sorto di actitud asina”,  el a declara. Aunke AZV ta un organo cu no mag di tin ganashi, pero nan ta hopi riba e gasto medico y esey ta pone cu e limitacion ta bira cada dia mas y mas. E ta un limitacion riba remedinan, tratamento cu no mag di wordo haci, no mag di haci testnan of manda e pashent pa specialista,  kiermen situacionnan cu  ta haci cu e dokter su man ta wordo mara profesionalmente pa duna e servicio ideal pa nan pashentnan.

“Pa simplemente corta gasto y esun cu a lo largo ta wordo perhudica ta e pashent”, segun Dr. Beke.

Aruba no ta un mini Hulanda

Otro punto cu e ta observa cu preocupacion como dokter tin di haber cu ainda ta existi e pensamento den salubridad publico cu Aruba mester ta un replica di tur locual ta sosode na nos madre patria. Nos no por nenga nos realidad, ya cu nos ta un isla di Caribe cu  un cultura y un forma di biba diferente,  y tur esaki ta wordo refleha tambe den e malesanan di nos pashentnan local. Entre nan nos habito den nos forma di come y biba, y esaki ta haci cu e manera pa atende nos pashentnan y duna nan e atencion debido, abo como dokter mester sa con bo lo por ahusta na  nos cultura.

“Esey ta e problema aworaki pasobra tur cos bo no por copia literalmente, pasobra Hulanda ta asina nos tambe mester haci asina. Nos no ta un mini Hulanda, nos ta Aruba situa den Caribe asocia cu Nort America, Centro y Sur America”. E ta haya cu esaki ta un punto cardinal cu nos mester comprende pa hiba un maneho di salud publico caminda nos mester ta mas asocia cu nos region.  Pero no solamente asocia cu nos region, sino tambe cu nos profesional medico y yiu di tera, cu a bay studia como dokter den nos region y kende nan mester haya un oportunidad pa traha riba nan isla natal.

 

You May Also Like

Gobierno ta pidi Citgo reconsidera decision pa ‘slow down’ operacionnan

Gobierno ta haciendo un apelacion na Citgo pa reconsidera nan decision di ‘slow down’ ...

Parlamento Hubenil ta spera un gobierno nobo pone mas oido pa necesidad di hubentud

Durante un entrevista cu vocero di Parlamento Hubenil David Quant y presidente Chloe Ruiz, ...

parlamento

Otro siman ta cuminsa trata presupuesto 2016

Parlamentarionan a haya te cu diaranson 12or di merdia pa presenta preguntanan por escrito ...

Departamento di Aduana ta lansa website nobo

Departamento di Aduana ta launch su website nobo www.douane.aw den compania di Minister di ...

Aruba: Paraiso pa laba placa

Un biaha mas nos pais ta den luz negativo den medionan internacional. Segun e ...

arubus tempo.jpg

Arubus: busnan ta core pero limita

Minister di Transporte a caba di anuncia cu e busnan ta core awe pero ...