E situacion pre-Covid ya tabata pa muchanan di Aruba un reto grandi. Y lo ta bon pa amplia e estudio ‘Quality of Life of the Aruban Youth’ pa midi e impacto di e pandemia riba un condicion cu caba tabata un motibo di preocupacion. Esey tabata e reaccion di Minister di Enseñansa dr. Rudy Lampe despues di a ricibi e rapport Calidad di Bida di e Hoben Arubiano, for di man di investigado Dr. Paula Kibbelaar.

Dr. Kibbelaar di IPA hunto cu Dr. Annemairie Slotboom di Vrije Universiteit Amsterdam, y Profesor dr. Jan Hendriks, cu Profesor dr. Catrien Bijlveld tabata encarga cu e estudio piloto, cu nan a califica como e Youth Monitor Aruba.

E estudio a identifica y analisa e factornan cu ta contribui na comportacion di riesgo y esnan cu a pesar di e condicion di riesgonan, toch ta conduci na un desaroyo saludabel di e mucha Arubiano den ultimo klasnan di educacion primario. E investigacion piloto tabata ehecuta den un marco y tin como obhetivo pa duna contribucion na e Plan Strategico Nacional Intrega, NISP, Nos Aruba 2025, e rapporta di Caft, e acuerdo di Gobernacion di Gabinete Evelyn Wever Croes, ademas di e implementacion of version di e Sustainable Goals di Nacionnan Uni, particularmente e SDG 3, 4 y 5. No menos importante, e estudio piloto aki mester sostene e Plan di Crisis Social, SCP.

E investigacion piloto aki a haci uzo di dos estudio cu e fin pa compila data y informacion. Uno ta e estudio cualitativo cu a produci danki na cooperacion di profesionalnan riba tereno escolar y uno cuantitativo unda a entrevista muchanan di 10 pa 13 aña na 11 scol primario rond Aruba.

E investigacion aki a trata na desaroya un instrumento di auto-informe cu por uza como herment pa monitorea hobennan pa tempo largo den scol primario y secundario. Lo por uza e monitor pa desaroya strategia pa promove salud, bienestar di hobennan y tambe evita cu nan ta cay den comportacion riesgoso.

Dr. Paula Kibbelaar a inicia e investigacion na 2019, despues cu Minister di Enseñansa, Direccion di Enseñansa a duna nan sosten pa e por haci esaki. Dr. Paula. Kibbelaar awe henter dia ta dunando un seminario riba e estudio na Direccion di Enseñansa, pa actornan concerni.

Un ekipo entusiasma di IPA a acompaña Paula Kibbelaar den presenta e Youth Monitor Aruba pilot, mirando e balor di e estudio aki pa haya un bista con pa atende cu e riesgonan cu muchanan na Aruba ta confronta y cu ta manifesta den nan comportacion y produccion na scol.

Den e proximo edicionnan lo amplia riba e investigacion importante aki y tambe e pensamento di Dr. Kibbelaar.

Potretnan ta ilustra dr. Kibbelaar haciendo e presentacion di e rapport na Minister Lampe, den presencia di Director di Enseñansa Annemarie Proveyer y un team di IPA. Dr. Slotboom tambe a participa na e ceremonia pa medio digital.

LEAVE A REPLY

Please enter your comment!
Please enter your name here