editorial 2_15_1.jpg

Nos ministro encarga cu enseñansa a logra capta atencion di prensa cu su plan pa financia drechamento di scol fiando placa via e formula ‘PPP’. Pa miho comprension di kico ta ‘PPP’ (Public Private Partnership) nos por compara esaki cu algo conoci den mundo di biahe y turismo:”Fly now, pay later”. Un partner ta fia bo placa pa bo realisa bo soño awor mes, anto despues e dolor di cabes ta bin di con paga e debe. Den e caso di modelo ‘PPP’, gobierno ta busca un partner di sector priva, cu ta encarga cu diseña e proyecto, busca financiamento, ehecuta y mantene e obra durante e periodo cu gobierno ta pagando e debe.

Manera ta e caso cu cualkier debe, e pregunta clave semper ta kico ta bo capacidad pa paga debe. Esaki ta loke banco ta investiga tambe ora bo bay busca un hipoteca pa cas, of pa financia un auto nobo. Den e caso di un gobierno esey no ta diferente. Esnan cu ta haya peticion pa financia, cu por ehemplo ta un fondo o banco di  inversion internacional, ta bay haci su trabao di investiga situacion financiero di e pais te den detaye. A base di esaki anto ta dicidi cu ta financia si of no. Aunke cu den cierto caso ta e partner priva, e compania cu ta bay haci e trabao, ta busca financiamento, loke finalmente ta conta ta e capacidad di pago di esun cu ta paga, y esey ta gobierno. Aunke e compromiso financiero aki no ta aparece como un debe directo di Pais Aruba, ta gobierno mester pone e suma anual riba su presupuesto cu mester paga pa e capital fia, interes riba esaki, mas e gastonan di mantenemento durante e periodo di e convenio.

Pero ban un rato na e asunto mes cu e ministro encarga ta trece dilanti. Prome cos cu nos lo mester constata ta cu e ministro tin tur rason pa entama e asunto aki. Ta un echo cu no por wordo nenga  cu mayoria di scol ta den deterioro severo, salvo e casonan cu a keda atendi caba den e ultimo añanan. Si nos memoria no ta faya nos, e colega ministro den e gabinete anterior tabatin como prioridad drecha infrastructura escolar, riba atende asunto di contenido di enseñansa. Esey ta loke el a uza na su defensa na varios ocasion. Finalmente gobierno a desperdicia un monton di placa, pero no tanto na infrastructura escolar. Cu resultado cu  e ministro actual keto bay tin e reto grandi su dilanti pa haci algo na e problema aki. Ta dificil pa argumenta anto cu e proyecto aki no tin cierto urgencia.

Awor mester discuti e situacion financiero di gobierno y e posibilidadnan di financia y paga durante e proximo binti aña e inversion aki na esun cu ta fia nos. Pa cuminsa, tur hende cu ta sigui noticia regularmente ta na altura cu e meta di gobierno ta pa otro aña yega na un presupuesto balansa, pa na 2018 cuminsa spaar placa via un surplus pa cuminsa baha nos debe total, cu ta actualmente na mas di 80% compara cu nos GDP. Yega na un convenio pa fia otro dos pa tres cien miyon florin pa drecha scol ta mustra bon, pero tin repercusion directo pa nos situacion financiero como pais. Nos sa cu e sabionan di partido berde lo core grita e ‘sabiduria’ cu ‘fia bao di PPP no ta aumenta debe di gobierno’. Nos tambe sa cu e debenan aki ta keda camufla den e tipo di proyecto aki, pero a final de cuenta ta gobierno durante tanto aña mester pone un suma fiho riba presupuesto pa paga e debenan aki. Y por bisa cu e compromisonan actual bao di e ‘formula magico’ di PPP ya ta yega na mas di 90 miyon pa aña. Conta acerca cu  awor caba nos ta pagando como 210 miyon na puro interes riba nos debenan directo, anto por comprende ta unda e placa di presupuesto mes ta bay, cu eventualmente bao di un gobernacion normal lo tabata disponibel pa financia drechamento di scol como inversion directo for di presupuesto. Ehemplo: si durante un periodo di gobernacion bo pone 25 miyon florin pa aña disponibel pa drecha scol, den 4 aña bo ta financia 100 miyon, sin fia placa! E problema ta netamente cu e maneho di desperdicio sin limite den e añanan cu a pasa a haci cu e capacidad riba presupuesto pa financia inversion directamente ta casi nulo! Esaki ta loke CAFT tambe a constata, cu e post di inversion no ta yega ni na 1%.

Ademas, CAFT a exigi e documentacion corespondiente di e proyectonan actual di PPP, entre otro pa por deduci si nan ta debe directo di gobierno si  of no. Nos ta spera cu pronto por tende algo riba esey. Mientras tanto, PPP ta añadi balente peso na e debe publico directo di 4000 miyon florin, sin cu ta atende e necesidad cu e ministro a trece dilanti. Esey ta consecuencia di un gobierno sin vision y sin rumbo.