President Donald Trump a duna su prome palabra di e matamento di Wassem Soleimani, bisando cu e general, kende a mata miles di Mericano, mester a ‘caba cu ne pa añanan largo caba’.

Lider supremo di Iran, Ali Khamenei a proclama cu su pais lo tin vengansa pa perdida di nan general mas halto. E Pentagon a bisa cu Trump a ordena e accion pa proteha e personal di Merca den exterior cu matamento di Soleimani, kende lo tabata desaroyando un plan pa ataca trahadonan diplomatico y miembro di servicio di Merca na Irak y henter region.

Secretario di Estado, Mike Pompeo a bisa CNN cu tin un menasa grandi den e region pero no lo duna mas detaye. E decision di tira un atake aereo ‘a salba bida Mericano’. E ta bisa cu centenares di bida ta den riesgo pa atake di Soleimani. Tambe a señala cu no ta busca guera cu Iran.

Soleimani tabata entre cinco persona cu a keda destrosa pa cuatro misil cu a tira contra avion. E comandante a keda mutila asina pisa cu mester a identifica e renchi na su man robes.

Embahada di Merca na Iran a bisa cu tur Mericano mester bandona Iraq di biaha. A recomenda pa nan subi un avion lo mas antes posibel pa otro pais. Rusia y China a reprende Merca di atake. Moscu a bisa cu ta un stap cu lo pone e tension bira mas grandi. Beijing a bisa cu mester mantene e pas den medio oriente y region.

Pompeo a confirma cu a papia cu lider preocupa di China, y tambe di Inglatera y Alemania. El a gradici nan aliado pa nan reconocimento di e menasa agresivo di forsa Quds Irani. Prome minister di Irak, Adil Abdul-Mahdi, a adverti cu atake di na distancia lo provoca un guera na Irak. El a bisa cu atake tabata un violacion grandi di soberania di Irak y un atake na e dignidad di e nacion.

Miles di persona a bay riba caya di Teheran pa protesta contra e crimen di e general, mientras nan ta grita ‘morto pa Merca’. Minister di defense Irani, Amir Hatami a bisa cu vengansa lo tuma luga pa e ‘matamento inhusto’

Prome Minister di Israel Benjamin Netanyahu tambe a reacciona bisando cu Soleimani ta responsabel pa morto di Mericano y otro persona inocente. E tabata planea mas atake. Minister di Relacion Exterior di Iran, Javas Zairf a bisa cu Merca a comete un acto di terorismo.

Democrata ta condena Soleimani, pero no ta di acuerdo cu Trump no a busca aprobacion di Congreso.

 

LEAVE A REPLY

Please enter your comment!
Please enter your name here