Proyecto Bisa No Na Abuso di Adulto Mayor/ No Excuse for Elder Abuse – parti 5A

Tuma e decision pa laga un ser keri muda pa un cas di cuido, normalmente, ta un paso pisa y carga cu emocion profundo, tanto pa e ser keri mes y e famia/cuidador. Ta comprendibel pa sinti un mescla di tristesa, culpa y nostalgia ora un capitulo importante den bida di famia ta cambia. Aunke e cambio aki por sinti como un despedida, hopi biaha e ta e unico escogencia pa garantisa e bienestar y siguridad di e persona cu bo ta stima ora e cuido na cas bira mucho pisa of imposibel.

Pa pasa door di e proceso aki cu trankilidad, tene e siguiente puntonan na mente:

E ta un cambio di rol, no di amor: Laga profesionalnan tuma over e cuido fisico no ta nifica bandona bo ser keri. Esaki ta duna bo e espacio pa bolbe ta simplemente yiu, pareha of famia, en bes di ta agota pa e trabou di cuido diario.

Cuido constante y un etapa nobo: Un bon cas di cuido mester por brinda ayudo medico y supervision 24 ora pa dia. Esaki no ta kita e recuerdonan bunita di pasado, sino ta habri un etapa nobo caminda boso por sigui comparti momento di calidad den un ambiente sigur y confiabel.

Haci e luga sinti familiar: Trece potret, un klechi favorito of obhetonan personal pa su camber nobo, ta yuda pa e espacio sinti mas caluroso, trankil y conecta cu su hogar di antes.

Nos adulto mayor merece lo miho

Na Aruba, nos ta conoci pa nos hospitalidad unda turista ta sinti nan mes “Bon Bini” y trata cu suma respet den hotelnan di clase. Sinembargo, e realidad pa nos propio adultonan mayor (65+) ta hopi biaha otro. Antes, tabata normal pa wela of tanta haya e miho camber den cas di famia ora nan keda nan so. Awendia, pa falta di, por ehempel, tempo of recurso, hopi biaha e cas di cuido ta bira e unico opcion.

Mientras leynan di higiena y ordenansa ta wordo aplica strictamente pa turismo, nos grandinan —cu a traha duro pa construi e Aruba di awe— hopi biaha ta haya nan mes ta comparti un camber chikito cu tres of cuater otro persona, leu di nan pertenencianan di custumber y luchando contra soledad. Pa evita cu nos ser keri bira un ciudadano di segundo categoria patras di porta sera, un investigacion profundo prome cu firma cualkier contrato cu e instancia di cuido ta vital.

Guia di Control: 4 Paso Prome cu Firma un Contrato

Ora di bishita un institucion, no solamente laga un edificio recien geverf of un recepcion amabel, gaña bo; corda semper cu berdadero calidad ta scondi den e rutina diario di e cuido.

Paso 1: Control cerca Gerencia (Base Legal y Financiero)

Prome cu recore e edificio, verifica e base di e institucion (por consulta documentonan riba website di Inspectie Volksgezondheid Aruba (IVA.).

Permiso y Inspeccion: Pidi pa wak e ultimo rapport di inspeccion di DVG of IVA y puntra con a drecha e puntonan di mehoracion.

Personal y Rotacion: Puntra cuanto enfermero tin riba warda di anochi y den fin di siman, y cuanto tempo e trahadonan fiho tin eynan. Un rotacion halto di personal ta trece cuido inconsistente cu ne.

Prevencion di Maltrato: Verifica si tur trahado y boluntario tin un carta di bon conducta, ken ta e persona di confiansa independiente, y con nan ta preveni burnout cerca e personal.

Transparencia Financiero: Exigi un lista por escrito di kico ta cubri pa seguro (manera AZV) of subsidio, y kico ta gasto extra pa cuenta propio (manera entre otro: pamper, labamento di paña of fisioterapia).

Paso 2: Observacion na e luga (Usa bo sentidonan)

Bishita e luga sin avisa, preferiblemente rond di ora di come of cambio di warda:

Holor y Higiena: E luga mester hole fresco. Holo fuerte di orina of exceso di clorox (pa tapa otro holo) ta indica mal rutina di limpiesa. (Por uza un housekeeping checklist standard como guia di limpiesa; esaki por acudi na F.A.A. (Fundacion Alzheimer Aruba) pa un copia na Papiamento).

Dignidad y Trato: Wak si e residentenan ta bisti limpi, cu cabey peña y nan bril of aparato di oido bisti. Scucha si e personal ta papia cu pasenshi na nivel di wowo, en bes di grita riba nan cabes of papia di nan den nan presencia.

Ambiente y Cuminda: E residentenan ta participa den actividad of ta sinta henter dia den rij dilanti un television na volumen halto? Check si e cuminda ta hole bon, si ta respeta dieta special (manera diabetes) y si ta yuda esnan cu no por come nan so.

Siguridad Fisico: Controla si tin vloer anti-slip, luga pa wanta fuerte den gang y baño, suficiente luz natural y salida sigur.

Paso 3: Señalnan di Alarma (Red Flags): Tene cuidou si bo nota un di e señalnan aki:

Restriccion di Bishita: Orario limita of insistencia pa traha cita prome cu cada bishita por ta scondiendo falta di personal.

Residente Mucho Seda of Suf: Si un grupo grandi ta drumi of sin reaccion memey di dia, esaki por indica uzo innecesario di calmante pisa (restriccion quimico).

Falta di Transparencia: Gerencia mester por splica abiertamente con nan ta raporta caida, eror di remedi of conflicto.

Paso 4: Cuido specialisa pa condicionnan compleho

Si bo ser keri tin necesidad medico intensivo, haci e preguntanan extra aki:

Condicionnan Neuro-cognitivo Mayor of Leve: Tin un cura cera, caminda e por cana liber den aire fresco sin sali riba caya? E personal ta entrena pa calma agitacion (cu musica of distraccion en bes di maramento fisico of droga)?

Limitacion di Movecion: Tin mashin di hisa, colchon contra herida di drumi (decubitus), baño accesibel pa rolstoel y fisioterapia regular?

Stroke (CVA): Tin logopedista pa problema di guli (verslik), material visual pa comunicacion (afasia) y guia psicologico pa depresion?

Dependencia di Substancia: Un dokter ta evalua tur uzo di alcohol, pildo di drumi of remedi pa dolor prome cu entrada pa evita abstinencia peligroso? Ta evalua remedi contra dolor cada 2 luna pa rebaha e sobre uzo (y polifarmacia)?

Despues di Admision: Con pa Mantene e Conexion y Control

E prome simannan despues di e mudansa ta crucial. Bo acercamento ta depende di e estado mental di bo ser keri:

Si Bo Ser Keri tin Problema cu Memoria (y/of un of otro condicion Neurocognitivo)

Un persona cu un Trastorno neurocognitivo hopi biaha no sa dicon e ta eynan, loke ta causa miedo of rabia. Duna e personal su “manual di uzo” emocional:

Entrega un “Perfil di Bida”: Skirbi riba un bladji con e gusta wordo yama, ki musica ta calme, kico ta pon’e rabia y su temanan favorito di combersacion.

Pidi pa Uza Distraccion: Splica e personal pa no discuti cu logica ora e puntra pa bay cas, sino pa uza algo familiar (un album di potret, su radio of un kopi di thee) pa calme.

Acorda un Ora Fiho pa Yama: Palabra un ora specifico (p.e. 4:00 PM) pa yama e hefe di departamento of persona di confiansa. Puntra especificamente con e a drumi, si e a come bon y si e a bira inkieto atardi (sundowning).

Si Bo Ser Keri Ta Completamente Consciente:

Un persona mentalmente skerpi por sinti tristeza profundo of un sentimento di a wordo “bandona” durante e prome dianan si bishita ta limita:

Verifica e Splicacion: Sigura bo mes cu e personal a splica bo ser keri cu un eventual regla di “No bishita” den prome dianan ta pa yud’e custumbra, y no pasobra famia a lubida riba dje. Keda den su vecindario, tenele activo y no lagele su so.

Mantene su Rutina: Informa e personal ki ora e gusta baña, lesa corant of wak cierto programa. Control riba cosnan chikito ta yud’e acepta e cambio.

Contacto Indirecto y Vigilancia: Manda karchi, nota na man of mensahe di bos. Pidi e personal pa vigila señalnan di depresion (manera isola su mes den camber) y avisa bo mesora.

Pregunta Practico pa Haci Tur Dia:

“El a come y bebe suficiente awe?” (Falta di apetit ta un señal di stress of tristesa).

“El a sali for di su camber pa sinta den sala comunal of participa den algo?”

“Cua momento di dia tabata mas dificil p’e y kico a yuda calm’e?”

“E tin mester di algun cos di cas ainda cu mi por bin laga na porta?”

(Conseho extra: Anota e nomber di e enfermero cu bo papia cu ne cada dia; esaki ta mustra cu bo ta un famia envolvi).

Puntonan di Reflexion:

Opinion y Conseho: Hopi famia ta drenta e proceso di muda un ser keri ciegamente: guia pa emocion, urgencia of conseho di un dokter of otronan.

Conseho:

Investiga/evalua prome cu actua: conoce e limitacionnan y necesidadnan medico di bo ser keri, conoce bo mes y mas ainda conoce y respeta e deseonan di e adulto mayor mes.

Investiga e reputacion, raportnan di inspeccion y personal di por lo menos 2 cas di cuido cu bo tin na bista y compara esakinan cu resultado di bo propio hallazgo y evaluacion.

Un bon preparacion ta evita posibel abuso y/of negligencia y ta determina e calidad di bida di bo ser keri den e ultimo fase di su bida. Un bes bo firma, ta hopi mas dificil pa cambia e situacion!

Conclusion

Entrega e cuido diario di un ser keri na un institucion of den man di otronan No ta nifica entrega bo responsabilidad como famia. Door di prepara bo mes manera un bon stratega prome cu admision y keda alerta despues di e mudansa, bo ta garantisa cu bo ser keri ta ricibi e respet, siguridad y dignidad cu e merece den su cuido.

Den e siguiente y ultimo edicion, 5-B, nos lo enfoca riba algun punto tocante con pa prepara bo mes y bo ser keri pa por muda pa un cas di cuido y kico pa tene cuenta cu ne pa un cuido di adulto mayor den su propio ambiente (residencial).