(AP) – President di Albania riba diadomingo a otorga e cantante Britanico di origen Albanes Dua Lipa e ciudadania Albanes pa loke el a expresa ta e artista su rol den plama fama di Albanes nan na nivel internacional pa medio di su musica.
President Bajram Begaj a bia cu Lipa a ser otorga e ciudadania prome cu Albania su di 110 aniversario di independia for di Imperio Ottoman. Begaj a expresa cu e ta considera un honor pa haci esaki pa motibo cu Lipa a trece fama na Albanesnan den henter mundo.
“Mi lo ta un Albanes riba papel tambe,” Lipa a bisa prome cu el a ricibi su ciudadania na Tirana City Hall.
Lipa a nace na London den aña 1995 cu mayornan inmigrante Albanes Anesa y Dukagjin Lipa di Kosovo. Lipa, ken a cuminsa canta for di su 5 aña di edad, tabata musicalmente influencia pa su tata, un ex cantante y guitarista di un banda di rock. El a cuminsa publica su canticanan riba YouTube ora cu e tabatin 14 aña di edad. Su prome album a ser lansa den aña 2017, y den aña 2019 el a gana su prome Grammy Award pa Miho Artista Nobo.
Conhuntamente cu su tata, e ta co-fundador di Sunny Hill Foundation, cual ta recauda fondo cu conciertonan anual na Kosovo pa yuda personanan cu ta experiencia problemanan financiero.
