(ElNacional/LaPatilla) – Como parti di e acuerdo di reinicia negociacion na Mexico, entre gobierno y oposicion na Venezuela, e empresa Mericano di petroleo Chevron a haya un licencia di gobierno Mericano pa opera na Venezuela, mara na cierto condicion estricto.
E licencia ta formula como un excepcion riba e sancionnan general cu ta autoriza Chevron pa reinicia operacion limita di extraccion di recurso natural, cu e condicion cu e benta di crudo y productonan deriva ta solamente posible cu mercado Mericano. Tambe ta permiti e compania importa na Venezuela producto manera diluyente cu ta necesario pa operacion na e pais. Sin embargo, siendo tur operacion di Chevron na Venezuela ta hinca den empresa local ‘joint venture’ den cual Pdvsa tin mayoria (60% por lo menos) di accion, ta prohibi haci cualkier pago di dividendo na Pdvsa, directo o indirectamente.
Chevron a confirma di a haya e permiso, y cu e decision di departamento di Tesoro na Merca, “ ta permiti e compania haci e trabao necesario di mantenimento na e empresanan conhunto, y cu esaki “a añadi transparencia na sector petrolero Venezolano y ta significa cu Chevron por comercializa e petroleo cu actualmente ta ser produci cu e activonan di e empresanan conhunto.” Chevron a declara tambe cu “Nos ta reitera nos compromiso pa desempeña nos negoshi cumpliendo cu e cuadro estableci (pa gobierno Mericano),” poco despues cu na Washington a anuncia otorgamento di e licencia.
E licencia emiti pa seis luna, ta impedi Pdvsa ricibi beneficio di e ganashi di benta di producto, y ta limita e actividad na e empresanan existente, no otro actividad cu Pdvsa.
Senador Mericano Rick Scott (democrata) a adverti diasabra pasa cu negocia pa otorga un licencia na Chevron na Venezuela ta “empodera un abusador di derecho humano”. Scott via rednan social a critica maneho di gobierno di Biden, cu ta sigura di ta defende democracia y derecho humano, “pero cu ta negocia cu esnan cu ta abusa”.
