‘E decision pa kita tur impuesto riba recibo ta crea espacio pa aumenta prijsnan desproporcionalmente’

Segun Jennifer Arends-Reyes banda cu e reforma fiscal tawata tin un ansha di otro mundo pa core pasa, e proposicion cu e gobierno di signatura di MEP-POR-RED a presenta ta den fase y su meta principal ta pa trece miyones pa caha di gobierno.

Den e tratamento di e ley di reforma fiscal tambe a trece dilanti cu ta prohibi tur comerciante pa pone cuanto di e prijs cu e consumidor ta paga riba e recibo. Si un comerciante kier pone riba e recibo e lo wordo castiga cu un multa di fls.10.000,-. Tur impuesto mester ta inclui den e prijs di e producto of servicio awor pero ta keda toch dificil pa e consumidor por midi con hopi e prijsnan pa producto a subi. Segun e ley e meta tras di e cambio aki ta pa transparencia pero alabes e ta crea un espacio pa comerciantenan pasa tur e gastonan cu nan tin extra, di utilidad, di transporte, di ganashi, di banco y di huur den e prijs pa consumidor paga. Si den e prome fase di reforma fiscal tin personanan ta bay dilanti cu fls 25,- pa luna y tin cu paga riba 200,- extra na aumento di producto, servicio y impuesto en berdad e no ta un adelanto pa ningun hende. Durante di un sesion na october 2018 organisa pa Raad van Advies cu tawata papia di un cuadro fiscalnan cu ta existi y a delibera den gruponan kico ta realistico pa Aruba, sigur e BTW manera cu algun politico di coalicion ta primintiendo nan votadonan no ta un opcion admistrativamente viabel pa Aruba. E top expertonan y profesionalnan fiscalista di Aruba incluyendo profesionalnan cu ta traha cu CAft tawata t’ey presente durante e Masterclass y tur tawata di acuerdo cu BTW no ta un opcion pa Aruba pa diferente motibo.

E sistema di BTW ta uno cu mag di cobra un schakel so y mester por demostra esaki via recibonan y ta netamente esaki ta haci cu na Aruba pa falta di entre otro personal y digitalisacion un tarea cu ta sumamente dificil. Pues pa tanten a keda e impuestonan tipo bbo cu conoce schakel y cu awor desde 2019 ta keda na e comerciantenan con hopi nan lo absorba of hinke plus otro gastonan den nan prijs. E inflacion ta sigui crece, e placa no ta yega manera antes mas y ta tristo cu ta tira tur e aumento di impuesto pa culpa di gobierno anterior pa paga debe siendo cu despues cu gobierno a cobra varios suma cu tawata pendiente ainda ta sigui aumenta gastonan y no kier pone locual ta e ‘meevallers’ of locual ta extra cu ta cobrando pueblo pa baha e debe tampoco. A bisa cu lo kier inverti den pueblo pero door di kita placa di pueblo, reduci poder di compra, hisa costo di bida y costo di operacion no lo tin suficiente fondo pa repara e daño cu ta causando entre otro riba tereno social, caminda tur mayor lo mester traha ainda mas duro, talbes mas cu un trabou, e bida familiar ta bay atras y cu por tin consecuencianan drastico pa e hobennan y muchanan sra. Arends-Reyes ta termina bisando.

You May Also Like

POR: ‘Maneho actual di medio ambiente no ta sostenibel’

Cambionan den infrastructura ta inherente na desaroyo di un pais. Desaroyo di un pais ...

Buscando otro opcion pa evita dependencia riba Venezuela so

“Despues di tabata dependiente pa hopi decada di Venezuela pa cierto fruta y berdura ...