11DiabeticoGenetico.jpg

Arubanonan no ta suficiente na haltura di e consecuencianan hereditario di biba un bida no saludabel. Den e caso di diabetes por ehempel mas y mas estudio ta confirma cu si abo ta haya sucu pa motibo di como malo y move tiki, esaki tambe ta daña e salud di bo yiu sea bo futuro yiunan.

Esaki ta un di e conclusionnan importante cu Bon Dia Aruba a saca a base di informacion duna recientemente na e ‘global summit’ riba diabetes pa Latino Merca, cual a tuma luga na Rio di Janeiro, Brasil. Nos corant tabata presente como unico prensa Rubiano y por a haci cobertura di un parti di e evento atendi pa dokternan, specialistanan, companianan farmaceutica y otro expertonan di gran parti di mundo.

Durante e evento e participantenan a comparti e ultimo desaroyonan riba causa, prevencion, tratamento y tambe estudio di remedi pa cu diabetes y su consecuencianan pa salud.

Por mira hopi similaridad den e causanan di e malesa na e otro paisnan Latino Mericano manera Mexico, Venezuela y Brasil den comparacion cu Aruba. Factor principal (y conoci) ta obesidad pa motibo cu ta come demasiado carbohidrato (pan, hariña hasa cu den curpa ta bira sucu), vet y tambe ta bebe mucho soft drink. Banda di esaki no ta move suficiente.

Na Aruba ta keha tambe riba e falta di infrastructura adecua pa stimula nos move mas. Riba e ‘global summit’  na Rio a bira cla cu tin mas pais (grandi) cu tin e problema aki y hasta na pais manera Nueva Zelandia. Eynan e problema di diabetes tambe tabata grandi te ora gobierno a tuma e responsabilidad pa cambia e infrastructura y awor estudionan ta mustra cu esaki realmente a baha e cantidad di diabeticonan den e pais aki.

Parti hereditario

Bon Dia Aruba a papia tambe cu e dokter Mexicano envolvi entre otro den proyecto di impuesto riba soft drink. Nan a logra di convenci gobierno pa implementa esaki na 2014 y e prome resultado ta mustra positivo.

 

Den un di e proximo edicionnan di Bon Dia Aruba lo sigui elabora riba e topico aki y otro informacion interesante cu a sali for di e global summit.

 

Awor nos lo enfoca riba e parti hereditario. Na prome instante e populacion Arubano ya caba ta vulnerabel pa haya diabetes comparando cu populacionnan di otro pais den mundo. Investigacion ta mustra cu nos populacion tin e deficiencia genetico aki.

 

Banda di esaki nos tin un populacion chikito, y aunke mas y mas ta casa cu stranhero, e chens ta keda grandi cu ambos di bo mayornan ta Arubano pasando e genetica aki pa bo.

 

Tambe nos cuminda crioyo no ta mucho saludabel: hopi hariña hasa (pastechi), aros, tiki berdura (hopi biaha nos salada ta macaroni) y hopi carni. Bebidanan faborito ta soft drink. Y locual hopi pareha no ta realisa ta cu nan estilo di bida ta afecta e salud di nan futuro yiu.

Den un combersacion cu un specialista na Rio di Janeiro (nomber conoci na redaccion), mayornan of esunnan cu ta planea pa haya yiu, ta considera insuficiente e parti hereditario. Den caso bo haya sucu y despues haya yiu, e chens ta hopi mas grandi cu bo yiu a herida deficiencia den su pancreas (e organo cu ta traha insulina natural).

 

Pues e chens cu e por haya sucu, ta mas grandi. Esaki tambe ta conta pa e tipo 2 di diabetes, cu hopi hende ta haya pa motibo di biba no saludabel.

 

Mucha na dialisis

E dokter tambe ta conta cu mas y mas hende na Aruba ta haya sucu riba edad abou pa motibo di biba no saludabel. Hasta tin mucha cu mester haci dialisis. Tin casonan masha tristo unda e mayornan sea no kier acepta cu nan yiu ta diabetico of no ta worry cu su tratamento. Tin un mucha por ehemplo cu tabata diagnostica cu diabetes ora e tabatin 10 aña. Pero pa motibo cu su mayor no tabata tene cuenta cu su malesa, e mucha a perde prome un par di su dedenan (diabetes ta afecta e circulacion di sanger sin cuido debido), y despues su riñonnan pa cu awor e ta rekeri dialisis continuamente.

Diabetes- y siguramente falta di sigui tratamento por causa hopi mas malesa, hasta cancer, y ta baha e perspectiva di un bida largo. Mas informacion lo sigui pronto. 

LEAVE A REPLY

Please enter your comment!
Please enter your name here