11mei, NW, oduber condominio.jpg

Tin dos condominio y un premium apartamento ta huur camber pa 70 dollar pa, auto di huur 20 dollar, incluso un desayuno mainta. A puntra Minister di Turismo sr. Otmar Oduber riba e situacion aki y si esaki ta un situacion di All-inclusive ilegal ya cu tin hotel ta All-inclusive. Pa motibo di a para e otorgamento di permiso na hotelnan, a bin demanda grandi riba condominio.

Por mira cu situacion asina aki a cuminsa bira un tendencia. Hotelnan tin cu cumpli cu e leynan cu tin, y awo e pregunta ta bin dilanti si ta haci un control riba condominio y apartamentonan. Minister Oduber a indica cu control lo tuma luga. Nan ta deliberando y den e combersacionnan cu tabata tin y den e maneho cu tin, e ta spera cu for di Parlamento nan por discuti ariba un amienda cu por bin riba e ley aki. Den e ley aki cu basicamente ta inclui condominionan riba e isla, pero tambe den e caso aki apartamentonan. Minister a referi riba tur compleho di apartamento cu ta riba 5 camber lo cay bou di e mesun margen aki di e permiso cu e mester pa por opera. E fenomeno di esaki ta cu e echo cu na momento a para e otorgamento di permiso na hotelnan, por a mira un demanda masha grandi den e demanda pa condominio. Condominionan cu a wordo cumpra, ta wordo uza pa algun siman of añanan, porta un pa dos luna pa aña, pero pa e resto di lunanan nan ta pone den un “rente pool.”

“Nan ta hinca esaki den loke ta e fenomeno global na e momentonan aki cu ta AirBNB y otro plataforma cu bo por pone bo cas, bo condominio of bo apartamento den e poolnan aki,” segun e mandatario. Pa prome esakinan ta mas facil, nan ta mas economico. Pakico nan ta mas economico? Esaki ta bin pasobra practicamente nan no tin empleado, nan no ta haci uzo di bartender of waiter, un busboy, un housekeeping den e propiedadnan aki.

 

Percura pa proteha hotelnan

Gobierno ta considera cu mester proteha e partinan di e hotelnan, unda cu tin empleadonan, tin gran cantidad di persona emplea den hotelnan. Mester percura pa proteha, percura cu nan mester por paga nan fair share, paga e impuestonan, cu na e momentonan aki por ta hopi di nan no ta pagando. P’esey gobierno ta combersando cu e diferente plataforma y cu SIA pa percura cu e cobransa aki tuma luga. Segun Minister, tambe nan ta papiando hunto cu Minister Bermudez riba un tipo di impuesto nobo, unda cu ta bisa na momento cu ta cumpra un propiedad na Aruba y e persona no ta un local cu e temporada cu e no ta haci uzo di e propiedad ey, tambe e persona tin cu paga un impuesto specifico. Haciendo esaki ta pa evita e intencion cu tin of limita e intencion cu tin di uza e condominio- of apartamentonan como base den rente pool y considera nan mescos cu hotel aki na Aruba, segun e mandatario.

 

Control

A puntra minister cua departamento ta esun encarga pa controla e situacion aki. Tambe tin cu ta huur autonan cu e plachi number A y esaki ta algo ilegal, ya cu e plachi numbernan A ta pa auto di uzo propio. Nan no tin permiso pa huur auto. E dos condominio cu ta haci esaki ta den e area di Palm Beach y e apartamento ta den area di aeropuerto. Restaurantnan y hotel ta sufri pa motibo di e situacion aki. Segun Minister Oduber, awor por sinti un tiki di e fenomeno aki di All-inclusive. “Si esey mes ta un problema, imagina bo ora bo haya e tipo di operacionnan aki y e manera ta pa bo tin hendenan den bo departamentonan percura pa e control tuma luga, ” el a indica. “Polis naturalmente nos sa pa basta tempo caba ta purba pa DTP su personal bay un curso, mientrastanto mi ta kere cera protocol cu Cuerpo Policial tambe pa no solamente e car rentals, pero bo wak e cantidad di hendenan cu ta opera via taxi pirata, via autobus pirata, cierto momento hasta servicionan di tour y esunnan O tin biaha nos ta gara cu ta haci operacion ilegal,” Minister a indica.

E control tin cu continua manera ta tumando luga aworaki, pasobra si stop di controla e cosnan aki lo bay for di man. Esaki ta algo cu gobierno kier evita, esey ta loke DTP conhuntamente cu Cuerpo Policial ta atendiendo cun’e na e momentonan aki y ta bin ta atendiendo cun’e. Mester tin e control y Minister ta kere cu un bon forma ta traves di e discusionnan cu lo bay den Parlamento, por ta lo fomenta un tipo di amienda cu ta incorpora den e ley di All-inclusive y permiso di hotel y pa opera un condominio of compleho di apartamento aki na Aruba tambe bo mester e tipo di permiso aki obtenibel for di gobierno y cu ta controla e operacion cu tin.

 

Unico control

E unico control cu tin na e momentonan aki ta cu ta haya ta un permiso pa construi pa traha un condominio of compleho di apartamento y pa loke ta e resto SIA tin cu controla si ta paga e impuestonan di BBO y BAZV, segun Minister Oduber. Mayoria di e condominio- of apartamentonan aki ta funciona manera un hotel y nan ta prefera di paga e BAZV y BBO di 3.5% na luga di paga e 9.5% cu ta casi e tripel cu nan ta supone di paga. Minister ta kere cu esaki ta cosnan cu e ley aki mester incorpora nan. Den e tratamento na Parlamento segun Minister, e lo purba di curasha Parlamento riba esaki pa nan por incorpora e parti di condominio y apartamento tambe pa e forma ey tin un control hopi mas estricto.

LEAVE A REPLY

Please enter your comment!
Please enter your name here