E refineria di Aruba tin casi 100 aña, pero asina mes, Quanten Consortium Aruba, QCA, LLC y su partnernan ta mira hopi potencial den e instalacionnan. Banda di e hecho cu tin un bon waf, e refineria ta mas cu hero bieu, segun Karl Welch, un di e socionan di QCA LLC.

“E refineria ta manera un hende cu ta un poco malo, pero cu mayoria di su organonan ta traha bon. E curason, higra y riñon di e refineria ta hopi bon manteni. Corda cu e instalacion ta banda di lama y ta logico cu locual ta exponi na tur elemento di naturalesa ta frustia. Y practicamente no a uza e refineria den su potencial desde 2012. Cualkier auto, cas y otro cu no haya mantencion y ta djis poni un banda pa ocho aña ta bay de decadencia. E realidad ta cu e refineria ta den bon condicion y lo kita e partinan cu no ta bon mas. ”

Tereno sushi

For di ciere di Lago, e ta conoci cu e tereno di e refineria ta hopi contamina. Tin hopi petroleo cu ta absorba den e superficie bou di e instalacionnan. “E responsabilidad aki ta di Gobierno di Aruba, pasobra el a sosode prome cu nos. Pero nos kier ta bon administrado na Aruba. Henter e isla ta 19 miya, y nos kier crea bon boluntad. Nos kier ta sigur cu nos no ta causa daño, y pa e motibo ey mes nos tin Profesor Kammen cu nos. Y nos lo traha cu Gobierno pa wak kico mester haci y con pa haci e limpiesa.”

Timeline

E reto mas grandi segun Welch ta e asina yama ‘timeline’. “E relacionnan cu companianan manera KBR, McDermott, UC Berkley, tur ta bini hunto y nos ta den proceso pa confirma nan a corto plaso.” Ta trahando riba e responsabilidadnan den diferente fase. E momentonan aki ta deliberando cu un compania cu ta bay ta encarga pa d kita partinan di e instalacionnan cu no ta bon mas. Despues mester yega na un contrato cu ta spera di por ta cla na Maart. Aunke cu ya caba tin un catcracker pa trece, mester delinea e tempo necesario pa drecha tur e instalacionnan y e pipanan, por ehempel. “Mester tin tur e documentonan cla. Y asina cu esey ta cla, lo por cuminsa. Karl Welch ta enfatisa cu si por logra tur e pasonan necesario manera tin planifica, lo por habri parti di e refineria den un aña, y cuminsa. “Y kizas den un aña y mey lo por habri inoficialmente.”

E intencion ta pa produci gasolin mesora y e speranza ta cu Aruba ta e prome cliente pa e producto aki, segun Welch. “E producto lo ta determina pa e mercado. Mi no por bisa tur locual nos lo haci, te ora cu e mercado determina.”

Duda ta normal

Semper lo tin critico y hende cu ta duda den e proyecto. Y e ta algo normal, segun Welch. “Nos lo ta mas transparente posibel. E unico cos cu nos por haci ta haci locual nos ta bisa cu nos lo haci. E enfoke sigur ta pa ta orienta riba e comunidad di Aruba, unda lo por yuda barionan. Educacion lo ta primordial. Semper tin hende cu lo keda cu duda. Tin biaha cu ami mes ta duda, pasobra manera mi a bisa mi partner Jeff, mi no sa si mi ta haci e esfuerso aki pa e compania of pa mi yiu. Pero bou tur circunstancia nos lo kier haci’e bon.”

E ta sigura cu QCA ta habri pa hende bin cu sugerencia kico e compania por nifica pa comunidad di Aruba. “Pero e ta un negoshi si, cu ta bay sostene Aruba. Nos ta bay paga belasting, produci trabou, y nos lo sostene economia di Aruba. Nos ta trahando riba e aspecto di medio ambiente, cu ta nifica haci e trabou den un forma corecto, ordena sin cu e ta crea un molester pa e habitantenan. “Nos ta manera mucha den un tienda di mangel, pasobra nos ta reconstrui y keda cu locual ta historico, pasobra loke nos ta haci ta un reconstruccion completo,” Welch a bisa.

LEAVE A REPLY

Please enter your comment!
Please enter your name here