Gobierno di Aruba a proclama aña 2021 como e aña di recuperacion. Despues di tur esfuersonan cu gobierno a haci na 2020 pa wanta e consecuencianan devastador economico y financiero pa pais Aruba, nos ta habri 2021 positivo y semper cu fe y speransa cu nos lo recupera di e pandemia di Covid-19. Y sigur pueblo completo ta consciente di e esfuerso nan grandi cu Gabinete Evelyn Wever-Croes a haci pa por a wanta e sla di Covid. Un aspecto cu mi persona ta pidi Gobierno ta pa keda evalua manehonan hiba prome cu Covid cu sigur no ta cuadra mas cu e consecuencianan di Covid y sigur lo mester trece ahustenan p’asina e recuperacion por ta exitoso. Den esaki awe lo mi pidi pa bin un ahustacion riba e otorgamento di terenonan di erfpacht.

Ahustacion di maneho di DIP pa locual ta erfpacht

DIP tin un maneho tremendo pa locual ta otorgamento di tereno erfpacht compara con esaki tabata bay den pasado. Pero debi na situacion di Covid hopi ciudadano cu añanan a keda warda riba un tereno awe cu nan ta na porta pa logra esaki ta mira cu debi na e situacion di Covid esaki ta bira imposibel y sigur ta trece hopi frustracion pa esunnan cu pa añanan a warda y awe no por logra yega na nan mesun cas. Un di e problemanan mas grandi ta e cantidad di placa cu un ciudadano por haya pa por traha su cas na e cantidad di meter cuadra cu ta ser exigi. Un ciudadano cu ta ambtenaar of cualkier ciudadano cu awo ta riba loonsubsidie cu a conoce rebaho den nan salario no por cumpli mas cu e cantidad di placa cu ta necesario pa por traha nan cas mientras cu si a cumpli cu tur otro exigencianan. Pa es motibo mi ta pidi pa DIP cu ta cay bao di encargo di nos Minister President pa evalua e maneho aki pa wak kico por haci cu ciudadanonan cu a perde kisas 5% por logra haya nan vergunning y por cuminsa traha nan cas. Tambe pa locual ta trata esunnan cu ta riba loonsubsidie actualmente si por tin un periodo di gracia mas largo kisas di un aña pa dunanan tempo den e aña di recuperacion pa nan tambe por recupera y por logra haya e financiamento necesario pa nan tambe por yega na nan cas.

Mi ta kere cu asina tin evalua tur maneho hiba prome cu Covid p’anan por cumpli tambe cu e vision di recuperacion den e pais aki y asina por yuda cada ciudadano y nan tambe por ta parti di e recuperacion real di Aruba. Tambe ta na su luga pa un revision rapido di e maneho cu ta ser hiba actual pa otorgamento di tereno y adapta esaki y sigur teniendo na cuenta cu un periodo di recuperacion pa e ciudadano cu awo debi na Covid no por yega na e fiansa necesario pa por traha nan cas.

LEAVE A REPLY

Please enter your comment!
Please enter your name here