E legado di David Johnson: Con ciencia, partnership y educacion a protege Aruba su shoco y ta duna un fundeshi pa proteccion di otro especie

Cientifico Mericano, David H. Johnson, fundador y director di Global Owl Project, a fayece luna pasa cu 69 aña di edad despues di a haya un diagnosis di cancer di colon na 2022. Aunke e tabata ricibiendo tratamento, el a sigui cu su trabao consehando investigadornan te cu su fayecimento.

Pa varios aña, Johnson tabata un di e pilarnan cientifico tras di Aruba su esfuerso pa proteha Aruba su shoco – Athene cunicularia arubensis – cu no por haya ningun otro caminda na mundo. Su morto ta marca e fin di un capitulo, pero e programa cu el a yuda construi ta uno cu lo keda cu nos pa henter nos bida.

E dedicacion y amor pa e trabao cu el a haci ta sumamente inspirador, y den edicion di awe Bon Dia Aruba lo refleha riba e trabao cu el a haci pa nos isla y tuma esaki como ehempel y motivacion pa sigui aplica tur loke a siña.

Esfuersonan pa cu proteccion di shoco na Aruba tabata canando caba prome cu Johnson a bira involucra. Aruba Birdlife Conservation (ABC) a pasa varios aña ta pusha y boga pa proteccion di shoco – cu exito na caminda na 2012 cu declaracion di shoco como un simbolo nacional – y eventualmente a cuminsa un partnership cu Aruba Conservation Foundation, anteriormente conoci como FPNA, pa preveni cu e shoco, banda di otro especienan, lo disparce. Algo cu talbes tabata falta ta un cuadro cientifico.

Esaki a cambia ora cu ABC a trece Johnson y Global Owl Project aden. Johnson su contribucion tabata yuda Aruba bay for di trabao di conservacion isola den direccion di un solo programa structura – uno cu a combina investigacion cientifico, proteccion di habitat, sitionan di neishi artificial, monitoreo sistematico y educacion publico. E cambio aki posiblemente ta e legado mas importante cu Johnson a laga atras na Aruba, pa motibo cu su trabao a sigui impulsa e deseo y esfuerso cu ya caba tabatin presente riba e isla.

E logronan practico di e cambio aki ta documenta. Na aña 2018, bao guia di Johnson a pone un tipo di renchi na e shoco pa prome biaha. Esaki por ta un detaye tecnico chikito, pero el a cambia e manera con tabata siña tocante e especie: investigadornan por a monitor sistematicamente e rasgonan individual, movecionnan, tasa di sobrevivencia y comportamento di reproduccion di shoco durante tempo – data basico cu cualkier plan di conservacion tin mester pa realmente funciona.

Johnson tambe a trece un solucion cu a proba su efectividad caba: un sistema di neishi artificial, prome desaroya pa shoco na Oregon. El a bin Aruba personalmente y a duna training na boluntarionan local tocante con pa construi, pone y monitor e neishinan aki. Na november di 2019, a instala e prome cluster di neishi artificial, y e contesta di shoco na esaki a confirma cu e metodo ta funciona.

E shoconan a haci uso di e neishinan aki, a pone webo y cria nan yiunan. Esaki a bira un di e prome exitonan concreto y visible di e programa. Eventualmente, e area aki so tabatin 22 neishi artificial.

E colaboracion a extende na investigacion genetico y di comportamento tambe y den crea un mapa di e habitatnan clave riba e isla, ademas di ‘corridor’nan ecologico. Segun Vogelbescherming Nederland, e trabao genetico aki a resulta den un conclusion importante: Aruba su shoco ta carga material genetico di ambos poblacion di shoco Norte y Sur Americano, y Global Owl Project a usa esaki pa investiga si e shoco no ta simplemente un subespecie, sino cu el a cambia lo suficiente pa considera esaki un especie completamente distinto.

E shoco aki ta ser haya solamente na Aruba y ta legalmente proteha como un especie den peligro di exincion y ta un simbolo nacional di e isla. Segun Aruba Conservation Foundation a informa algun aña atras, investigacion a indica cu e isla mester di por lo menos 300 par di shoco cu por reproduci pa un poblacion saludable y resiliente – y Aruba su areanan protegi existente e tempo ey so tabata demasiado limita den cuminda y espacio pa traha neishi pa por sostene e cantidad aki. E hecho aki so tabata un factor den e desafio di henter conservacion: proteha shoco no ta nifica solamente proteha un area. E ta nifica tambe busca manera pa e shoco sobrevivi y reproduci exitosamente den y rond di e espacionan unda hende ta biba y construi.

Esaki tabata precisamente e problema cu e metodo cu Johnson a construi tabata di y ta sigui atende, y e motibo dicon e menasanan di shoco ta traduci na un lista accesible y facil di compronde pa tur cu busca informa y educa nan mes: perdida di habitat y fragmentacion causa pa construccion, accidente cu vehiculo, cachonan los riba caya, venenamento y desaparicion di sitionan safe pa traha neishi. Ningun di e factornan aki tin un solo solucion. Nan ta rekeri e tipo di metodo structura manera investigacion, monitoreo, mapa di habitat, neishi artificial y educacion publico trahando hunto, y esaki ta loke Johnson a yuda instala.

Na momento di su fayecimento, Johnson ainda tabata involucra den plannan pa sigui amplia su trabao di manera significante. Alrededor di 500 neishi artificial plama rond di e isla, un plan di proteccion nacional, reserva di shoco permanente y un di dos centro di educacion, investigacion y rescate plania pa San Nicolas.

Presidente di Aruba Birdlife Conservation, Greg Peterson ta cita di a comenta cu e organisacion lo sigui cu e programa, nombrando e expansion di neishi artificial, proteccion di habitat y completa e plan di proteccion nacional como su prioridadnan principal. “Su conocemento, diseño, investigacion y guia ta keda parti di e programa,” Peterson a expresa. “Su legado ta sigui biba cada biaha cu un shoco drenta un di e neishinan cu el a desaroya.”

Tin aprendisahe tocante con a construi e programa aki cu ta bay mas leu cu un solo especie di shoco. E prome ta cu e exito den conservacion aki, riba un isla chikito, ta depende riba partnership den varios sector cu ta uni pa traha den logra un meta comun.

E di dos les ta cu data mester bin prome cu intervencion di escala grandi: monitor e shoconan y studia nan genetica no tabata un proyecto na banda, e tabata loke a forma e fundeshi cu a bisa expertonan ki intervencion – manera e neishinan artificial – realmente ta funcionando, na luga di adivina.

E di tres les, y posiblemente esun cu ta mas facil di transferi, ta cu un especie cu no tin unda pa biba mester tin proteccion unda hende t’ey caba, no solamente den e areanan cu nos ta pone un banda pa naturalesa.

Un otro legado importante cu ta keda cu nos ta cu e conocemento aki no ta specifico na solamente shoco. E mesun combinacion aki – data cientifico, mapa di habitat, intervencion crea pa match con e especie realmente ta biba, monitor consistente y educacion publico pa residentenan bira partner activo – por aplica directamente na otro especienan endemico y menasa di Aruba, y te hasta na su matanan tambe.

Aruba su cadushinan nativo y reptilnan endemico, tin varios especie cu ta enfrenta un problema similar na esun di shoco: habitat fragmenta bao presion di desaroyo, cu tiki data tocante kico ta exactamente necesario pa combati esaki.

Johnson su modelo ta provee un contesta aplicabel na casi cualkier escala: haya un partner cientifico cu ya caba a soluciona un problema similar, hasta na nivel internacional, adapta e solucion na ecologia specifico di Aruba y involucra pueblo cu ta comparti espacio cu e especienan aki, na luga di trata conservacion como algo cu solamente ta sucede dentro di cierto espacionan designa.

Pa tanto investigador, academico, experto como ciudadano comun di Aruba, e manera mas importante pa honra e legado di Johnson por ta algo simpel y facil: reporta e programa su progreso, sostene e organisacionnan cu ta impulsa esaki padilanti y trata e neishinan artificial, mapa di habitat y plannan di conservacion cu Johnson a construi no como un solo homber su proyecto, sino como un responsabilidad continuo di henter e isla.

Potretnan di pagina di Facebook di Aruba Birdlife Conservation