Segun Gisbert Boekhoudt, director di Departamento di Naturalesa & Medio Ambiente (DNM), e sistema di dump ta uno antiguo cu a cuminsa den e temporada di e segundo guera mundial y en berdad a yega tempo pa cuminsa introduci cierto cambionan na dje.
Sr.Boekhoudt ta conta Bon Dia cu tabata tin un sitio di dump na un otro caminda prome cu esun actual tabata den existencia, pero e dump actual na Parkietenbos cu a start den e periodo di aña 1940/1945, a crece te cu na añanan 1990 na unda e la cuminsa wordo defini y a construi un muraya rond di esaki. Despues tabata tin un intencion pa stop cu e operacion nan na e dump actual pero a sigui tog riba dje cual segun sr. Boekhoudt no tabata e intencion na largo plaso.
”Locual ta pasa den fin di siman, e operacion cu Serlimar ta andando cune na Parkietenbos, mi no sa si nan ta haci otro proceduranan pero e acumulacion di sushi ey riba a bira un problema y kimamento mester ta alinea na e contract cu nan tin pero ultimamente no tin mag di eigenlijk tin kimamento na dump mes. ”
sr. Boekhoudt ta splica Bon Dia.
Fin di siman cu a pasa, e biento a cambia y a resulta cu henter e vecindario a haya problema cu esey. Normalmente e biento ta bini for di e ‘noord-oost passaat’ y pasa over di Parkietenbos, e ta bay den lama y over di e rif y sa di tin hende cu ta pasa cu boto eybanda y a yega di keha y tambe na Renaissance, no solamente riba rednan social pero kehonan directo cerca DNM segun sr. Boekhoudt.
Comunidad mester cuminsa percura pa tin menos sushi posibel
sr.Boekhoudt ta conta Bon Dia cu un di e puntonan mas importante ta pa comunidad mes cuminsa percura pa tin menos sushi y tambe sigur mester cuminsa procesa esaki den un forma mas sano pa esunnan cu ta traha eynan, biba den e vecindario y en general pa nos medio ambiente. ”Turista ta mira e cosnan aki y ta puntra si e ta BBQ of fiesta e ta. Pero esaki no ta un fiesta. Esaki ta algo cu no mester ta pasando den e temponan cu nos ta bibando awo. Tin basta tempo trahando riba dje caba anto tin solucion na caminda , pero eigenlijk en berdad ta preferibel cu e solucion ta ayera y no bini mayan of otro mayan” , sr. Boekhoudt ta bisa.
E solucion cu ta mas cerca aworaki segun sr. Boekhoudt ta sigui agrega ta cu e compania cu ta otro banda di caminda, esta EcoGas, nan tambe ta procesa e sushi pero den un machine na unda nan tin tres forno y di esaki nan ta saca gas cual ta wordo transporta pa W.E.B. pa traha coriente di dje.
”Pa Parkietenbos mes, e mester wordo drecha den un manera cu e polucion no por sali for di eyden, y specialmente cu e ”as” cu ta sali for di e proceso di converti sushi den gas na EcoGas. E ”as” generalmente e ta 10 pa 15% di e total massa cu ta drenta despues e proceso, 10 pa 15 % ta resta y esey mester wordo warda of deshaci den un manera cu e no ta bay haci daño despues. Tur e material ta concentra den e momento ey den e ”as” of sea cu biento of awacero of infiltracion di awa di lama si e bay bao di sub-suelo, e por wordo mobilisa y esaki no por pasa”
Sr. Boekhoudt ta agrega cu si bo mira e situacion aki den comparacion cu un cas, generalmente e baño ta esun di mas costoso den henter e cas. ”Caminda cu nos ta deshace di nos sushi ta un ”Frans Toillette”, cual ta un buraco den tera y e ta e manera di mas barata y mas inhigienico anto e no ta fit cu e cas cu nos ta biba den dje. Mira nos aeropuerto, cual ta un entrada, nos wafnan cual ta un otro entrada, wak nos jardin cual ta e beachnan, wak e hotelnan cual ta e logeerkamer nan. Nos cushina nan, e restaurante nan. Nos den Caribe incluyendo Merca tin e riolwaterzuivering installatie cu e percentahe di mas halto den Caribe cu nos ta procesa nos awa sushi. Pero e sushi solido, mester di un renobacion riba un nivel hopi mas halto.”
