Tur e elementonan t’ey pa un bon conflicto den Reino, cu gobierno di Aruba lamentablemente como un di e protagonistanan. E problema y conflictonan a cuminsa montona, y nos tin miedo cu esaki no por bay caba bon. E proximo problema por surgi siman entrante caba, cu e deadline cu CAft a pone pa nan haya contesta concreto riba cierto asunto cu nan kier mira defini. Prome pregunta cu ta surgi den un caso asina ta: ta rasonabel loke nan ta desea? O ta algo exagera cu e ministro y gobierno no tin pakico cumpli cune?

Loke ta tumando lugar ta cu CAft ta sigui traha, y ta dunando follow up na corespondencia cu e mandatario encarga cu finanzas di Aruba, unda nan ta basa nan mes riba e ley (LAft) manera e ta formula te awe. E ley nobo no ta na vigor, y mas probable nunca lo yega asina leu tampoco. Por ta cu tin algun cu lo bisa cu no tin ley at all, ya cu e ley tabata vigente te cu fin di aña 2018, y cu p’esey tambe supuestamente no tin supervision mas. Esey no ta e caso. Den e protocol firma na november 2018 ta papia bon cla di e papel cu CAft ta keda hunga como asesor di tanto gobierno di Aruba como di gobierno di Reino. Tambe e protocol ta bisa cu si e LAft adapta no drenta na vigor prome cu e proyecto di ley di presupuesto keda aproba pa Staten, e presupuesto 2019 lo keda estableci conforme e normanan di e protocol y CAft lo usa esaki den su evaluacion di e (proyecto di ley) di presupuesto 2019. Tambe e protocol ta menciona cu lo traha acuerdo ainda pa evaluacion di CAft.

Awor, diferencia di opinion por existi, pero si tin hende cu kier bisa cu no mester tene cuenta mas cu e organo di supervision aki, nan ta kiboca. No colabora cu nan segun e reglanan estableci den e ley, y argumenta cu e ley no ta na vigor mas, ta e eror mas grandi cu nos por comete, o mejor dicho, nan por comete na nos nomber. Kico ta e caso? E otro banda di e acuerdo, formula den e protocol, si ta keda tene e organo di supervision operando. Si na cierto momento ta cuminsa nenga nan informacion pa nan por haci nan trabao, ta posible cu nan ta bin busca e informacion forzosamente. Con esey lo tuma lugar? Tin e stipulacion den e ley LAft cu ta obliga entidadnan gubernamental pa duna nan cooperacion, pero si e funcionarionan publico haya orden di nan superiornan pa no coopera, por sucede loke a pasa na 2014. E tempo ey un Algemene Maatregel van Rijksbestuur a duna Gobernador orden y potestad pa busca y haya tur informacion cu tabata necesario y cu pa logra esaki e por demanda, cu brasa uniforma como apoyo, entrada na cualkier edificio di gobierno pa busca tal informacion, y ademas demanda cooperacion di tur empleado publico cu mester duna asistencia den esaki. E tempo ey e prome ministro a manda un notificacion (circulaire) rond pa e departamentonan den cual el a instrui nan pa no duna cooperacion na Gobernador. Y kico a sucede? Nan tur a coopera…

Pero nos no ta kere cu e asunto mester yega asina leu. Esey ta rekeri si cu sano huicio mester prevalece, unda esey na e momento aki no ta e caso. Y un di e cosnan cu mester sucede ta cu mester acepta cu tin un supervision ainda, simplemente pasobra no ta nos ta ni pone ni kita supervision. Y tin asunto unda e mandatario y e gabinete mester reflexiona seriamente. Por ehemplo, e peticion di CAft pa nan haya un plan multi-anual di e reforma fiscal cu gobierno ta planificando. Con bo ta bay bisa un organismo di e nivel aki cu ‘nan lo ser informa segun fase’. Cu otro palabra, ta tene e plan confidencial te ora ta bay ehecuta e siguiente fase, pasobra no ta confia nan? Na e nivel ey nos ta opera?

Pakico aki nos ta haya e leve impresion cu ta sconde e plan total, pasobra no tin un plan total? Por ta cu e plan fiscal ta den un rumbo incierto, pasobra tur e alternativanan ta politicamente inatractivo? Nos no ta haya esey straño, nos no conoce gobierno na mundo cu a gana popularidad cu medida financiero, y sigur no cu cambio den ley fiscal, cu ta implica saca mas placa di cartera di hende, a lo menos, asina e ciudadano ta mir’e. Ta inimaginable cu un gobierno cu ta actua cu paso sigur ta hay’e den e problema actual cu comercio y nan propio fraccion pa un discusion futil riba impuesto riba factura si of no? Si no ta sigur kico lo sigui finalmente como ley nobo, pakico no a laga e BBO manera e tabata? Y si a opta pa kita BBO etc. for di factura, pakico no a splica esey debidamente? Berdad ta cu mester a deshaci di e tantismo manera pa factura BBO, pero pakico no bisa esey?

Na lugar di actua cu contundencia, ta buscando problema na otro banda, en berdad hungando cu candela? Wel, e candela t’ey.

 

LEAVE A REPLY

Please enter your comment!
Please enter your name here