Home Local Economia su recurso mas valioso ta atencion humano

Economia su recurso mas valioso ta atencion humano

102

Den cualkier economia, e recurso mas valioso ta atencion humano. Mas sinembargo, smartphone nan a horta hopi negoshi di esaki te hasta ora nan ta paga. Un opinion skirbi pa Mike Elgan di Computer World ta argumenta pakico.

Sr. Elgan ta subraya cu e no ta importa ki tipo di negoshi un hende tin, mayoria ta dependiente di servicionan humano pa e negoshi por draai. No solamente empleadonan ta wordo paga pa nan labor, experiencia y sabiduria, pero tambe nan creatividad y e atencion cu nan ta duna un negoshi.

Pa experimenta cu e pensamento, sr. Elgan ta sugeri pa imagina cu antes un persona tabata wordo paga pa pone atencion na su trabao ocho ora. Awendia, esey a bira shete pasobra e ultimo ora e empleado ta enfoca riba Facebook. Esaki kiermen cu e empleado ta wordo paga mesun cos, pero su atencion no ta eynan durante oranan di labor.

Problema serio
E atencion cu un empleado tabata duna su trabao, aworaki ta wordo transferi pa un otro compania cu si ta saca placa di esaki.

Mark Zuckerberg, CEO di Facebook esencialmante ta pasa e ganashi di un compania pa esun di dje. Y e ta haci esaki tur dia, efectivamente subiendo su ingresonan. Claro, e ta mas complica di locual e ta aparenta di ta. Empleadonan no solamente distrai pa Facebook. Tambe nan tin online shopping, what’sapp, y hopi mas. Locual ta mas alarmante ta cu e problema ta keda crece.

Estudio
Globalmente, e oranan cu un hende ta pasa online a subi drasticamente. Cu un averahe di mas cu dos ora pa dia, cu e uzo di smartphone nan esaki ta sigui subi.

E generacion despues di millenials cu ta esencialmante adicto na nan telefon pronto lo drenta mundo di labor y representa companianan. Esaki ta e motibo principal pa cual algo mester wordo haci cu e problema di distraccion pa medio di telefon.

Estudionan cientifico a comproba cu mas dependiente un persona ta na su telefon, mas dificil e ta pa nan ta trankil te hasta ora e telefon no ta den uzo. Den un test haci, unda cu un grupo a keda cu nan telefon cerca di nan riba ‘silent’ den un mesun camber y e otronan a pone nan telefon den cambernan separa – a sali afo cu esunnan cu a pone nan telefon den un otro camber a out perform esunnan cu a keda cu nan telefon cerca riba silent. Ciencia ta dicta cu esaki ta pasobra telefonnan ta ocupa den nos bida un ‘privileged attentional space’. E ta similar na scucha un hende bisa bo nomber, e ta yama bo atencion di biaha pasobra e ta papiando directamente cu bo of di bo.