Parlamentario Bermudez a pone un paso importante dilanti den e lucha pa mehora nos infrastructura y baha e congestion di trafico riba e caminda di Palm Beach.
Durante tratamento di e Presupuesto 2026 di DOW, parlamentario Bermudez a presenta un mocion oficial pa cuminsa cu e estudionan necesario pa transforma e crusada di Palm Beach – Caya Nelson Florencio Sprok den un rotonde moderno, eficiente, cu iluminacion y matanan grandi/bunita sin mester stroba visibilidad den trafico. Dicho mocion a keda aproba unanimamente pa e 17 miembro di parlamento presente.
E crusada aki ta un di e puntonan cu tur dia, residente, trahado, turista y empresario ta enfrenta retraso, congestion y situacionnan peligroso den e area. Bermudez ta enfatisa cu Gabinete AVP-FUTURO ta sigui demostra cu infrastructura, seguridad vial y calidad di bida di nos comunidad ta prioridad. Mientras otronan ta critica sin presenta solucion, Gabinete AVP-FUTURO ta traha riba planificacion, inversion y progreso real pa Aruba y pa su comunidad, segun un comunicado di prensa.
Segun e comunicado, parlamentario Bermudez ta consciente cu un proyecto manera un rotonde no ta algo cu por realisa di un dia pa otro. Esey ta precisamente pakico un gobierno responsabel mester ta proactivo, haci estudionan tecnico serio y prepara solucionnan sostenibel pa futuro. E mocion aki no ta solamente pa beneficia residentenan di Palm Beach, pero tambe miles di automobilistanan cu diariamente ta uza e ruta aki pa bay trabou, hotel, scol, negoshi y/of cas.
Despues di e tratamento di presupuesto di DOW y informacionnan comparti pa Minister Herde, Parlamentario Bermudez ta convenci cu Gabinete AVP-FUTURO ta sigui comprometi cu mehoracion di nos camindanan, modernisacion di infrastructura y desaroyo balansa pa tur districto di Aruba.
