Gobierno di Aruba, den colaboracion cu Dienst Landmeetkunde en Vastgoedregistratie (DLV) ta contento cu e implementacion di TERENO a drenta su fase final, marcando un paso decisivo den modernisacion di servicio publico na Aruba.
For di diabierna dia 8 di mei a cuminsa cu trabounan di migracion di e sistema bieu pa e plataforma digital nobo. Diadomingo mainta, un team dedica a cuminsa cu e control y validez di e traspaso di data, pa sigura cu e transicion keda ehecuta di forma sigur y eficiente, segun un comunicado di gobierno.
Minister di Infrastructura, drs. Rene Herdé (AVP) tambe tabata presente diadomingo pa asina duna sosten y gradici e team pa nan dedicacion y esfuerso.
Segun e planificacion actual, pronostico ta cu pa dia 11 di mei na final di dia, e aplicacion di TERENO lo ta operacional internamente pa DLV. Segun e comunicado, esaki ta un paso importante prome cu su implementacion mas amplio pa stakeholdernan externo.
TERENO ta un portal digital cu lo permiti usuario nan pa solicita informacion cadastral completamente online, eliminando proceso manual y reduciendo necesidad di presencia fisico. E plataforma ta funciona como un punto central, sigur y transparente pa interaccion cu DLV.
Entre e beneficionan principal di e sistema nobo ta destaca e aumento significativo den eficiencia di proceso, servicio mas rapido y accesibel, transparencia total den siguimento di solicitud, reduccion di carga administrativo y miho calidad di data.
Ademas, TERENO ta fortalece colaboracion entre stakeholdernan door di facilita intercambio sigur di informacion, contribuyendo na un sistema di administracion di tereno mas integra y moderno.
Gobierno di Aruba ta enfatisa cu esaki ta un ehempel concreto di su compromiso cu digitalisacion, innovacion y mehoracion continuo di servicio publico. E implementacion di TERENO no solamente ta un cambio tecnologico, pero un paso structural pa servicio mas eficiente y orienta na e ciudadanonan di nos isla.
