Economic Outlook 2017 Banco Central

 

Banco Central di Aruba a publica su pronosticonan pa 2017 recientemente. Como cu e informacion aki ta importante pasobra e ta completa e editorial den edicion aki (pagina 5), nos a dicidi di bolbe publica e cifranan y pronosticonan mas relevante.

Den Banco Central su ‘Economic Outlook’ pa 2017 ta resalta e cifra di crecemento revisa pa 2016, cu -0,6% compara cu e pronostico anterior di september 2016. E proyeccion di crecemento di GDP real pa 2017 ta calcula na 3,4%. GDP nominal a cay na 2016 te Afl. 4774 miyon, compara cu  Afl. 4819 miyon na 2015,. Pa 2017 ta anticipa un crecemento te na Afl. 4876 miyon. E crecemento aki lo tuma luga principalmente bao influencia di e inversionnan den e refineria, cu inicialmente mester a cuminsa caba den ultimo kwartaal di 2016.

Banco Central ta raporta, cu for di reunionnan teni cu Refineria di Aruba, Citgo Aruba y gobierno, nan ta conclui cu:

  • E inversionnan den e refineria ta bay den fase, den un periodo di 48 luna, cuminsando na juli 2017. Esaki ta constitui un desviacion di actividadnan di inversion compara cu e GDP anticipa anteriormente;
  • Den di dos mita di 2022 y prome mita di 2023, ta anticipa inversionnan grandi pa completa un turnaround planea;
  • RDA, e entidad cu ta propietario di e refineria, lo ricibi pago anual di lease for di Citgo Aruba;
  • E refineria lo start operacion na dos tercera parti di su capacidad na 2020, cu transicion pa full capacidad na 2021.

Turismo: despues di un 2016 virtualmente ‘flat’, 2017 ta anticipa pa trece un mehoracion di nominalmente 1,7% den ‘tourism receipts’. Banco ta adverti cu e hotelnan tin intencion di di logra esaki a traves di aumenta nan ‘Average Daily Rate’ (ADR), pero mester tene cuenta cu e cantidad di bishitante ‘stay-over’ y e cantidad di nochi di bishitante lo baha cu 1,9% y 1,7%, respectivamente. Ta anticipa un aumento den airlift for di Merca cu por contribui pa aumenta yegada, pero cu esaki no por compensa e perdida di parti di e mercado di Venezuela.

Consumo local: consistente cu e actividad turistico vacilante, consumo priva a disminui cu -3,9% na 2016. Esaki ta refleha tambe den un caida di 4,8% den credito na consumidor, principalmente pa motibo di menos prestamo personal y pa vehiculo. Prestamo hipotecario si a mira un aumento di 4,5% na 2016, cu e observacion cu un parti di esaki ta debi na inversion den acomodacion alternativo pa turista, y no pa vivienda.. Consumo local lo aumenta moderadamente cu 2,3% na 2017.

Desaroyo den nivel di prijs segun Banco Central ta indica ainda un ‘deflacion’, anticipa pa yega na  -1,1% na 2017.  Esaki bao influencia principalmente segun Banco Central, di e tarifanan di electricidad cu a haya un rebaho di 15% entrante 2017.

Balansa di pago na 2017 lo mira un deficit di Afl. 281,5 miyon, despues cu 2016 a mustra un surplus di Afl. 268,3 miyon. E deficit na 2017 lo ta causa principalmente pa e aumento den importacion di bienes di inversion y di consumo relaciona cu e rehabilitacion di e refineria. Principalmente e deficit riba cuenta di bienes ta anticipa di crece cu Afl. 502,5 miyon te na Afl. 1998,8 miyon na 2017.

Riesgonan pa e Outlook:

Positivo:

  • Un recuperacion mas fuerte di loke ta anticipa den turismo, posiblemente bao di un clima economico internacional mas faborabel;
  • Cambio positivo den confiansa di consumidor cu ta stimula consumo local.

Negativo:

  • Exportacion di servicio turistico afecta pa cambio na banda di demanda, e crisis economico na Venezuela y creciente tension politico internacional;
  • Aparte di e riesgonan di inversion relaciona cu timing y financiamento di e refineria, proyectonan relativamente grandi di inversion tin hopi peso riba crecemento di e componente di inversion, como tambe den proyeccion di consumo y empleo. Ta p’esey cu posibel retraso den ehecucion di proyecto grandi di inversion ta influencia negativamente inversion y consumo;
  • Prijs di petroleo por ta bastante  suheto na cambio repentino, y por influencia prijs di combustibel pa consumidor. Acuerdo di hedging ta mantene prijs di fuel oil constante.

You May Also Like

Retraso reapertura refineria tambe discuti na Hulanda

E discusion cu a cuminsa siman pasa over di e retraso den e proceso ...

60 dia mas di detencion pa minister Croes, caso den corte na december

Hues comisario a prolonga e detencion di minister Paul Croes y su chauffeur Roque ...

Homber Rubiano gara cu 20.000 dollar na aeropuerto

Siman cu a pasa duana a gara un pasahero Arubiano di 25 aña di ...

fundacion jordan ling Br.JPG

Problema relaciona cu salud mental “por toca cada ken…”

Ayera a keda introduci oficialmente e fundacion Jordan Ling cu a bira un partner ...

Premio maximo den miho servicio pa Aruba Airport Authority

Recientemente Aruba Airport Authority (AAA) a ricibi e premio maximo pa e Service Quality ...

Baby di aña

Ainda OM no a dicidi si lo persigui tata prome baby di aña

Den e caso di e tata di e prome baby di aña, Ministerio Publico ...