Edificio bandona propiedad di gobierno ta crea impresion di ghetto den caya grandi

Edificio bandona den area di caya principal ta un riesgo cu nan por wordo converti den refugio di e adictonan ambulante of choller house.

Ex edificio di Niki Habibe cu a bira propiedad di Aruba, ya cu gobierno a cumpra e edificio aki pa facilita e ruta di e tram, ta bandona y te hasta representa un peliger. Entre otro por nota cu e blafon y dak a cay aden. E ta un mahos bista pa un turista cu ta yega te final di caya. Te hasta e lo por pensa cu ‘esaki ta ghetto’, segun e comerciante Frank Tieleman. Logicamente e ta haya cu un situacion asina no ta atractivo, te hasta e panorama di e edificio aki ta spanta e turistanan, potencial cumpradonan den caya y ta net e tram ta lora rond di edificio aki.

E comerciante estableci den caya, sr. Tieleman kende a yega di fungi como ex presidente di MAMBO, a declara na Bon Dia Aruba cu den pasado nan a yega di bringa e problematica aki. Sr. Tieleman a indica cu si e adicto cahero popularmente yama choller ta un problema ‘bo tin cu tene nan no den caya’. Un opcion lo ta haci uzo di varios fundacion entre nan Adopt an Addict cu tambe ta traha pa rehabilita nan. Ya cu no por tin un sheltter memey di un shopping area.

MAMBO tabata e asociacion antes tabata atende cu caya grandi, pero despues di e renobacion y embeyecemento di e caya aki a wordo crea OBID pa atende cu ne. E ta kere cu unabes caya ta wordo maneha como un negoshi unda mester tin un tipo di Street Manager cu ta den un payroll di un organisacion cu por realisa e trabou di mercadeo pa stimula e benta nan den caya. E persona aki por maneha caya y hacie productivo realisa actividad y evento, etc.. Ya cu ‘aworaki no tin nada’, segun sr. Tieleman.

Pero otro funcion lo ta pa coordina e luganan cu a keda bashi y bin cu un sitio central unda e hendenan por busca informacion pa huur. Tin varios localidad cu a keda bashi, ya sea cu e establecimento comercial cu tabata t’ey a cera definitivamente of nan a move pa otro sitio, ya sea eventualmente den e area cerca di e hotelnan.

E edificio bashi ta keda un preocupacion ya cu nan ta sitio morto cu no ta contribui pa e bon bista y reactivacion comercial di caya grandi. E ta sugeri pa bin cu un maneho caminda e organisacion cu ta maneha caya ta bin cu cierto ordo pa no laga pa ehempel e bentananan kibra. Net dilanti di su negoshi tin un edificio grandi cu bentananan ta kibra pa añanan.

E ta haya esaki un di e motibonan pa kico e turistanan no kier baha for di tram. E problema ta sinta cu no tin un maneho y mientras no tin un maneho defini nada ta cambia. P’esey ta importante pa un organisacion por tuma over di un forma eficiente e maneho di caya. pero tambe pa cada comerciante den e area aki compromete nan mes y haci nan intento individualmente.

Recientemente gobierno nobo a anuncia e instalacion na nivel di varios minister pa atende y busca un solucion pronto na e situacion di caya, ya cu e ta parti di nan plan di gobierno.