(NLTimes) – Hulanda ta manda un ekipo di buskeda y rescate pa Venezuela pa duna asistencia despues di un serie di teremoto, ministerio di Asuntonan Exterior a informa. E unidad Urban Search and Rescue (USAR) lo manda personal, cachonan capacita y ekipo specialisa despues cu Venezuela oficialmente a pidi ayudo internacional.

“E situacion ta critico,” minister di Comercio Exterior y Cooperacion pa Desaroyo, Sjoerd Sjoerdsma, a declara. “Mirando e grandura di e desaster y e hecho cu Venezuela ta un pais bisiña di Reino Hulandes, Hulanda inmediatamente a ofrece sosten door di manda ekiponan USAR.” E minister a pone te cu 2 miyon euro disponibel pa financia e operacion.

Un vocero a bisa cu ainda no ta cla ki ora e ekipo USAR lo biaha pa Venezuela. “Aworaki nos ta enfoca riba e preparacionnan logistico,” e vocero a bisa, agregando cu ainda no ta sigur si nan por sali diahuebs. Ta spera cu por lo menos 61 rescatista lo forma parti di e mision, cu ta e tamaño minimo standard di un ekipo USAR.

Autoridadnan Venezolano ta informa cu e cantidad di morto a subi pa por lo menos 164 persona, mientras cu por lo menos 971 persona a resulta herida. Minister Sjoerdsma a expresa su simpatia pa tur esnan afecta, hunto cu minister di Asuntonan Exterior Tom Berendsen, kende a publica riba X cu e tabata “shock” pa e magnitud di e desaster.

Varios pais Europeo tambe a compromete nan mes pa brinda ayudo na Venezuela. Francia ta manda 85 miembro di buskeda y rescate, Spaña ta manda 54 militar, y Alemania ta prepara seis avion di transporte cu por ser usa si ta necesario. Paisnan bisiña den e region tambe a confirma cu nan lo brinda sosten.

E ekipo USAR a participa den varios mision grandi di rescate internacional den añanan reciente, incluyendo e explosion den waf di Beirut na 2020 y e teremoto devastador na Turkia y Siria na 2023. Na 2017, e unidad Hulandes di rescate tambe a presta asistencia na Sint Maarten despues di horcan Irma.

Rey Willem-Alexander y Reina Maxima a expresa nan simpatia na pueblo di Venezuela despues di e teremotonan. Venezuela ta considera un pais bisiña di Reino Hulandes den region Caribe, cu frontera maritimo cercano na Aruba, Corsou y e municipio special Boneiro.

“Nos pais bisiña Venezuela a ser golpia pa teremotonan devastador. Nos pensamento ta cu tur persona afecta y cu e famianan cu awor ta biba cu preocupacion pa nan sernan keri,” e pareha real a bisa den un declaracion publica riba nan paginanan di rednan social oficial.