Ta wordo premira cu dia 5 di juli awor Republica Dominicano lo celebra otro eleccion presidencial den su historia democratico. Tambe e biaha aki e pueblo Dominicano lo eligi vice-presidente, diputadonan, senadornan y miembro pa parlamento Centro Americano.
E eleccion aki tabata programa inicialmente pa dia 17 di mei ultimo, pero Hunta Central Electoral (JCA) a pospon’e cu dos luna mas, debi na e pandemia di Covid-19.
Na Aruba, vocero di Consulado di Republica Dominicana, Edward McCollum, a declara na Bon Dia Aruba, cu ya caba nan a ricibi un carta di gobierno di Aruba firma pa nos Prome Minister, Evelyn Wever-Croes di no obhecion pa celebra e eleccion Dominicano na Aruba. E eleccion aki lo tuma luga tentativamente na Centro di Bario Playa Pabao dia 5 di juli awo, entre 8’or di mainta y 6’or atardi.
Sinembargo teniendo cuenta cu e situacion actual di e pandemia y apertura gradual di Aruba su frontera, ta complica pa e delegacion di JCE, maximo autoridad den e proceso aki, lo por bin Aruba. A mesar di e situacion aki, consulado ta trahando pa eleccion aki por conta cu e presencia di e tecniconan di JCE. Pero tambe mester tene cuenta cu si nan ta yega Aruba nan mester di 14 dia di cuarentena, y ainda e frontera cu Republica Dominicana ta totalmente cera debi na e situacion di e pandemia.
Sinembargo el a laga sa cu JCE tin asigna na Aruba nan representante kende ta encarga cu e parti logistico hunto cu e consulado. Ainda nan ta bezig cu algun proceso pa realisa e eleccion aki na Aruba. Sr. McCollun a pidi tur persona interesa pa tuma contacto cu Sra. Gladys Santana via e consulado Dominicano na Aruba.
