(Infobae) – Tesla, Microsoft, Google y Anthropic ya ta acelera competencia di AI pa plataformanan di desaroyo di software.
Elon Musk, CEO di Tesla y SpaceX, ta sigur cu dianan di e profesion di programacion ta limita. Segun e empresario, avance acelera di inteligencia artificial lo nifica cu pa final di 2026, programacion, manera nos conoce awo, lo no ta necesario mas.
E ta argumenta cu trabao di desaroyadornan lo ser reemplasa pa sistemanan di AI capas di transforma instruccionnan den idioma natural directamente den software funcional.
Ki ora programadornan lo termina, segun Elon Musk
Durante intervencionnan publico reciente, incluyendo World Economic Forum na Davos 2026 y un reunion interno di xAI, Elon Musk tabata directo: “Pa final di 2026 nos no lo tin cu preocupa mas cu programacion.”
E magnate ta kere cu evolucion di modelonan di idioma y algoritmonan di AI ya ta permiti automatisacion di un parti considerable di trabao di desaroyo di software.
Musk ta bisa cu e avance lo ta asina lihe cu, pa final di e aña aki, programacion manual lo perde su nificacion y lo ta reemplasa pa sistemanan inteligente cu lo produci archivonan ehecutable for di descripcionnan simple den idioma natural.
Su vision ta basa riba e hecho cu, actualmente, hermentnan manera GitHub Copilot, OpenAI Codex y Claude di Anthropic ya ta provee solucionnan completo basa riba instruccionnan basico. E empresario ta sigura cu e tendencia lo bira mas profundo, y cu pronto modelonan di AI lo genera directamente ‘binaries’ optimalisa pa cada architectura, sin mester pasa via idiomanan manera Python, Java of C++.
Esaki ta nifica cu programadornan lo no tin mester di skirbi codigo mas, sino simplemente declara e rekisitonan di e software den idioma diario, lagando e resto na e mashin.
