(AP) – Elon Musk lo demanda OpenAI y CEO Sam Altman a causa di loke e ta bisa ta un traicion di ChatGPT su metanan principal di beneficia humanidad na luga di persigui ganashi.
Den un demanda otorga na San Francisco Superior Court, biyonario Musk a bisa cu hasta ora el a sostene OpenAI su creacion, el a sigura un acuerdo cu Altman y Greg Brockman, e president, di mantene e compania di AI como un fundacion cu lo desaroya tecnologia pa e beneficio di e publico. Bao su acuerdo di fundacion, OpenAI tambe lo haci su codigo uno habri na e publico na luga di bende esaki pa cualkier compania priva su ganashi, segun e demanda.
Sinembargo, pa medio di crea un relacion cercano cu Microsoft, OpenAI y su ehecutivonan top a hala e pacto aki un banda y ta cambiando e compania su mision, Musk ta acusa den e demanda. “OpenAi Inc. a ser transforma den un subsidiario di e compania mas grandi di tecnologia den mundo: Microsoft,” e demanda a acusa. “Bao su hunta nobo, e no ta solamente desaroyando pero tambe e ta refina un AGI pa maximalisa ganashi pa Microsoft, na luga di pa e beneficio di humanidad.”
AGI ta referi na Artificial General Intelligence, cual ta e proposito general di sistemanan di AI cu por haci un trabao mesun bon of te hasta mas bon cu ser humano den un gran variedad di tarea.
Musk ta demanda a causa di kibra e contract, kibra responsabilidad y practicanan inhusto di negoshi. Tambe e kier un ordo cu lo preveni cualkier persona, incluyendo Microsoft di beneficia di OpenAI su tecnologia, cual segun e demanda no tabatin e intencion aki for di comienso.
