Diadomingo a tuma lugar un eleccion primario na Argentina, cu no a laga ningun ganador ni perdedor. Mauricio Macri a haya apoyo di e poblacion di clase medio na Argentina, pasobra ta e accion cu a hiba Macri pa presidencia di Argentina na 2015. Cristina Fernandez a demostra cu lo conserva su liderazgo di oposicion na Buenos Aires, despues di haya un empate tecnico cu e grupo oficialista.
Si e resultado di siman cu a pasa lo ripiti den eleccion di 22 di october proximo, anto e grupo di partido oficial mester depende di mas aliado pa impone su criterio den Congreso. E apoyo tabata suficiente pa mas di un aña y mey pa gobierno di Macri, analistanan a splica.
Eleccion di october lo renoba mita di e diputadonan y un tercio di Senado. Te awor, e proyeccion electoral ta mustra cu den Congreso un mayoria di representante di oposicion lo por domina, lidera pa partido Frente para la Victoria y nan aliadonan diputado di 70 kirchnerista, 44 di Partido Justicialista (PJ), di 257 asiento) y den Senado tin 29 kirchnerista y 12 justicialista, di 72 asiento.
E partido Cambiemos a haya 24 senador y 104 diputado, situacion cu lo obliga e grupo di oficialismo pa negocia cu disidente di e partido cu ta sigui linea di Peron (PJ).
Partido Cambiemos tabatin un triunfo na e distrito di peso, Buenos Aires (49% contra 20%) y Cordoba (46% contra 28%), pero a perde na otro distrito manera Santa Fe, cu poco diferencia di voto (27,8% contra 27,1%).
Empate tecnico
Tur wowo ta riba resultado di provincia di Buenos Aires, caminda Fernandez ta postula pa drenta den Senado. Buenos Aires ta un distrito cu mas di 40% di e poblacion di elector, cu ta renoba 35 diputado y 3 senador, cu e mayor cantidad di asiento.
Gobierno di Argentina a considera, basa riba un 96% di voto conta caba, cu diadomingo cu a pasa a keda registra un empate tecnico entre oficialismo y kirchnerismo na provincia di Buenos Aires, e mayor distrito electoral di pais, den e eleccion primario.
Un 95% di mesa na Buenos Aires a ser conta caba, y den categoria di Senado e partido Cambiemos a haya 34,19% di voto, partido Unidad Ciudadano cu tabata lidera pa Cristina Fernández (2007-2015), a haya 34,11 %. Buenos Aires ta concentra como 37% di voto di henter e pais.
“Macri a haya un ratificacion di apoyo cu el a haya for di e base electoral minoritario, mesun hende cu a permiti cu Macri a drenta den di dos buelta na aña 2015,” segun Gabriel Puricelli, politologo.
Kichner a keda ocho decimo mas abao di su rival oficialista, encuanto su posibilidad di keda eligi como pre-candidato pa Senado, na provincia di Buenos Aires. Sin embargo e conteo di voto ainda por cambia e resultado final, na fabor di
Kichner, Adrián Pérez, titular di Secretaria di Asunto Politico y Institucional a splica.
Awor e posibilidad ta riba mesa di eleccion di october
E politologo Rosendo Fraga a resalta cu gobierno di Macri a haya un victoria como forsa nacional, pa motibo cu simpatisante di tendencia politico cu ta apoya Peron a separa, sin embargo e cantidad di apoyo pa Macri a haya un limite y esey ta e situacion tradicional di e clase trahado di Buenos Aires”.
“A pesar di e resultado cu a sali for di Buenos Aires, Cristina a gana e zona urbano, caminda un parti grandi di e pais ta biba.” Argentina ta domina pa un polarisacion politico fuerte y cu ta cambia su escenario constantemente.
