Ayera nochi tabata presentacion di e programa di partido AVP na Renaissance Convention Center. Simpatisantenan di e partido a atende e evento aki yen di bandera y banners cu e palabra ‘Padilanti’ skirbi riba nan, como cu asina e programa su lema ta. Nos a acerca e candidatonan pa clarifica kico pa nan e palabra aki, progreso kiermen.
Chris Dammers a expresa cu e partido AVP a purba e biaha aki den cuadro di e concepto di 1000 voz pa conecta cu e comunidad y tende nan opinion. “Nos a pone diferente mesa unda personanan por a expresa nan opinion riba cuestion di asunto social, infrastructura, entre otro.”
E tambe ta toca e tema di poder di compra, cu segun e ‘ta importante pa tur hende’.
“Nos mester wak kico mas nos por haci pa baha e costo di bida. Hende cu tin e duro cu minimumloon, nos mester por mehora nan situacion. Por ehempel, nos ta pensando pa introduci subsidio di huur pa cierto casonan.”
Segun Marksonn Maduro, pa midi progreso mester tin un bon disciplina y stabilidad. “Cu e gobierno aki cosnan ta wordo haci y cosnan ta pasa, por ta no den e mesun dia of aña, pero alabes ta e vision cu e gobierno ta trece.”
A puntra pa clarifica e punto aki, por ehempel pa splica kico progreso lo nifica pa hobennan.
Sr. Maduro ta splica cu ‘mester tin ambicion y motivacion. Un guia tambe ta importante, pero mas importante ta pa bo traha riba bo mes pa bo mes’.
Formacion di hende
Minister di Husticia Arthur Dowers ta splica cu por midi progreso di diferente manera. “Pero e parti mas importante ta e desaroyo di e ser humano mes. Ta notabel cu Aruba a crece den aspecto infrastructural y economico den e ultimo añanan. Pero mas cu e aspecto material awo mi ta kere a yega tempo pa enfoca riba formacion di hende.”
Un persona cu a atende e evento aki a comenta cu ‘progreso pa mi ta ora tur ciudadanonan tin e mesun derechonan y e mesun oportunidadnan’. “Tambe bo por wak e na e calidad di bida di e habitantenan di un pais. E ta berdad cu nos como un isla tin un infrastructura basta avansa y cu e facilidadnan cu ta wordo brinda na e ciudadanonan ta haci nan bida mas facil. Esaki tambe ta progreso. Pero personalmente mi ta pensa cu progreso ta conta riba un nivel mas individual, por ehempel pa duna mas oportunidad di educacion.”
