(NLTimes) – 130 empleado di Red Light District na Amsterdam a skirbi un carta habri na arkitectonan y companianan di construccion, pidiendo pa nan no involucra den e ciudad su proposicion pa centronan erotico ‘High Rise’.
E centro lo reemplasa Red Light District, pero varios empleado di e sector aki tin preocupacion cu e ta un alternativa peligroso segun AT5. Ex empleado y fundador di Red Light United, Felicia Anna, a conta AT5 cu 93 porciento di e empleadonan cu a participa den e encuesta ta den contra di e cambio aki. “Esaki ta pinta un mensahe cla, y ta manda un mensahe directo,” el a bisa.
Un di e motibonan principal pa cambia di localidad ta pa haci Red Light District mas sigur y preveni cu e yena cu demasiado hende, segun AT5. Sinembargo, Felicia Anna a conta cu hopi di e empleadonan ya caba ta sinti nan mes sigur den e districto, y al contrario, e ta preocupa cu un edificio cera lo causa trafico sexual.
Plan pa cambia e sitio di e empleadonan sexual aki for di Amsterdam su centro na un centro erotico of “hotel di prostitucion,” posiblemente fuera di e ciudadn, tin hopi aña den desaroyo. Den april di aña 2021, e ciudad di Amsterdam a bisa cu nan ta considerando e districto Haven-Stad como un localidad posibel. Haven-Stad actualmente ta desaroyando un area industrial na Sloterdijk, Westerpark y Cronelis Douwesterrein segun e municipalidad di Amsterdam.
Maryo, un experto di experiencia na Prostitution Information Center a conta AT5 cu e tin hopi duda tocante e siguridad di e localidad aki. “E ta un area industrial, cu hopi biaha ta peligroso y no ta den bista general. Aki na Red Light District, tur hende conoce otro. Bo sa exactamente ki empleado ta traha pa cua oficina. Si algo pasa, tur hende t’ey.”
