Ayera atardi durante un conferencia di prensa di Departamento di Labor y Investigacion conhuntamente cu Oficina Central di Estadistica (CBS) nan a trece dilanti informacion tocante encuesta di Forsa Laboral di aña 2021.

Esaki ta e 11 aña consecutivo cu nan ta bin haciendo e actividad aki pa haya sa con e forsa laboral ta desaroyando na Aruba, manera Yvonne Lee-Perez di Departamento di Labor y Investigacion a splica. El a agrega cu esaki a tuma luga un biaha mas entre e instancianan aki pa nan por colecta datonan di e forsa laboral.

E motibo di pakico ta midi e forsa laboral di Aruba, segun Lee-Perez, ta cu e tasa di empleo, desempleo y inactividad ta un indicado importante cu ta duna un bista di e desaroyo economico di Aruba. Pa e motibo aki ta primordial pa tene e encuentro di forsa laboral 2021 y asina sigui e desaroyonan cu mercado laboral a tuma luga desde Censo 2020.

Manera ta conoci Censo 2020 tabata den man di Oficina Central di Estadistica y tambe ta forma parti di e metanan di Desaroyo Sostenibel, na unda cu di e 17 meta, segun Lee-Perez a anuncia, un ta indica cu mester tin datonan recien pa asina por adapta, traha y dirigi maneho factibel.

Na momento di colecta datonan, nan ta sigui recomendacionnan internacional pa asina despues nan por compara e resultadonan cu otro paisnan den region y tambe mundialmente. Esaki ta importante pa motibo cu nan ta desea di midi e tasa di desempleo mas frecuentemente, por ehemplo cada kwartaal manera Lee-Perez a sigura.

E encuesta di forsa laboral 2021 ta e prome den e serie di investigacionnan di labor cu lo bay tuma luga periodicamente. El a indica cu esunnan cu lo ricibi un invitacion pa completa e cuestionario di encuentro di forsa laboral 2021 lo wordo puntra pa cooperacion di encuestanan di labor den futuro cu un frecuencia di dos te cu cuatro biaha pa aña.

E metodologia ta igual cu esun cu a usa pa Censo 2020, di forma digital y telefonico cu lo inclui preguntanan di posibel cambionan den estado laboral di e personanan den e encuesta.

Di su parti, Desiree Helder, ken ta director di CBS, a trece dilanti cu e encuesta aki di forsa laboral lo cuminsa dia 1 di november. Prome cu fin di siman nan lo manda un e-mail pa esnan cu den Censo a expresa cu nan lo kier coopera den diferente encuestanan, na unda cu nan lo haya un link pa asina por completa un cuestionario. Tambe lo por yama na telefon 524-7433 pa haya mas informacion di personal di CBS.

Helder a menciona cu esaki ta un cuestionario mas enfoca riba e area di labor, na unda cu nan ta pidi pa personanan mayor di 15 aña pa yena e cuestionario aki lo mas pronto posibel.

Tambe el a sigura cu nan no lo pasa di cas pa cas pa haci e encuesta aki, pa motibo cu ainda e situacion di Covid-19 ta hunga un rol, y tambe cu nan kier haya datonan den un periodo hopi cortico, mirando cu casi aña ta bay caba y si nan ta bay bishita cas pa cas, esey lo dura hopi mas.

E total di e hogarnan cu kier colabora cu Censo den encuestanan aki ta un tercera parti di e total di hogarnan na Aruba manera Helder a expresa cu ta nifica un cantidad basta amplio.

LEAVE A REPLY

Please enter your comment!
Please enter your name here