Un intento global, di mas di 120 pais pa busca un manera pa cobra impuesto global mas husto riba gigantenan di internet, ta bayendo dilanti a pesar di paisnan individual dicidiendo pa pone nan propio impuesto, segun presidente di e organisacion internacional liderando e proyecto.
Angel Gurria, secretario general di e Organisacion pa Cooperacion y Desaroyo Economico (OECD na Ingles), basa na Paris, a bisa ayera na e cumbre G7 na Francia cu ‘locual nos ta mirando ta un señal hopi fuerte y hopi cla cu kier haya un solucion multilateral’.
Francia a introduci un impuesto di 3% luna pasa riba companianan digital cu por tin nan sede otro caminda pero ta gana biyonnan den negoshi digital manera aviso y retail na Francia. Esey ta inclui companianan manera Google, Amazon y Facebook, pero tambe empresanan online grandi Chines y Frances.
E acto a causa presidente Mericano, Donald Trump, pa rabia, menasando cu pone tarifa riba biña Frances como represalia.
E meta di e impuesto Frances ta pa stop e companianan di pone sede regional den hurisdiccion cu tiki impuesto pa limita nan exposicion den paisnan cu impuesto halto, manera Francia. Gobierno Frances ta bisa cu lo elimina e impuesto si tin un solucion den e proceso di OECD, cual tin como meta un resultado pa fin di 2020. Francia y otro pais cu a bay den direccion di un impuesto riba companianan digital a bisa cu nan lo ‘sunset’ nan medida, nificando cu nan lo deshaci di nan si e palabracionnan na OECD hiba na un resultado.
Bou di e marco di OECD, paisnan ta trahando pa un miho manera pa defini unda companianan mester paga impuesto. Tambe tin un esfuerso paralelo pa sigura cu corporacionnan multinacional paga un nivel minimo di impuesto.
OECD di 36 pais ta un fuente di data economico y ta trece miembronan y partnernan hunto pa traha hunto riba asuntonan global clave.
