Banco Central di Aruba a caba di publica cifranan financiero te cu juni 2021, loke pa Bon Dia Aruba tabata motibo pa reuni e cifranan di e seis lunanan inicial di aña, y haci un comparacion cu e añanan anterior, 2019 y 2020. Tambe a añadi un resumen di cifra di aumento di empleo, a base di datonan di Banco di Seguro Social (SVb) pa e mesun periodo.

Layout please pone tabel 1 aki

Den e resumen general aki (Tabel 1) por observa cu entrada total di gobierno ta desaroyando den direccion positivo, loke ta coresponde tambe cu e impresion general cu tin di actividad economico den promer seis luna di 2021. Sin embargo, por nota tambe cu contrario na 2020, un parti mas grandi ta debi na entrada cu no ta impuesto. Como indicacion di actividad economico por mira cu den e periodo bao observacion aki, januari – juni 2021, entrada cu ta bin di impuesto ainda ta menos cu loke a ricibi den e mesun periodo di 2020. Mester tuma na cuenta si cu 2020 a conoce un inicio ‘normal’ di aña na nivel di 2019, te cu comienzo di e pandemia di Covid-19 na maart.

Layout please pone tabel 2 aki

Den Tabel 2 a reuni algun di e impuestonan cu por ta indicativo pa nivel di actividad economico den promer mitar di 2021, compara cu e mesun periodo di 2019 y 2020. Por observa cu pa impuesto di importacion y accijnzen, tambe BBO/BAVP, entrada di gobierno ta surpasa e nivel di e categorianan aki na 2020. Un indicacion bon di recuperacion di actividad economico.

Loonbelasting

Esaki ta un categoria special cu varios aspecto pa tuma na cuenta. Na promer lugar entrada di loonbelasting no ta refleha solamente actividad economico, pasobra parti di e payroll ta ser paga cu subsidio, sin cu necesariamente esey ta refleha actividad economico. Di otro banda, esey ta yuda pa mantene loonbelasting, entre otro, na cierto nivel. Esaki por significa cu por tuma lugar cierto aumento di actividad economico, sin cu esaki tin un relacion directo cu aumento laboral, ya cu e forza laboral ta presente caba, en todo caso pa un parti. Por mira anto cu e entrada di loonbelasting den e mesun periodo cu BBO/BAVP y impuesto relaciona cu importacion a aumenta mas fuerte, a keda na un nivel bao di esun di mesun periodo di 2020. Pa trece un poco mas claridad den e materia aki, nos a consulta e datonan cu Banco di Seguro Social (SVb) ta ofrece di registro di empleado y di cupo di trabao.

Layout please pone tabel 3 aki

Por mira (Tabel 3) un aumento continuo den e cantidad di empleado, di cupo di trabao y di dunador di trabao den e promer seis luna di 2021, aunke den e ultimo categoria aki e crecemento tabata minimo den ultimo lunanan. E mayor crecemento di empresa registra oficialmente, remarcablemente, a tuma lugar durante 2020 caba.

Tambe por mira cu desde 1 di januari 2021 te cu 1 di juli 2021, e cantidad di persona registra na SVb a aumenta cu 790, loke por considera bon pero tampoco spectacular. Por considera esaki alrededor di 1,5% di e forza laboral, cu a haya empleo den e seis lunanan cu a transcuri. Aki mester tuma na cuenta si cu e empleadonan cu tabata registra anteriormente caba, a keda registra durante e pandemia a base di subsidio. E aumento ta trata anto solamente cupo di empleo nobo. A pesar di e mehoracion relativo aki, ainda e organismo ta registra mas di dos mil persona menos cu na januari 2020, anterior na e pandemia. Dia 1 di januari 2021 SVb tabatin practicamente 3.000 persona menos registra cu na mesun fecha di 2020.

Resumiendo por bisa cu tabatin un aumento di actividad economico remarcable, cu den segundo parti di aña lo por bira mas fuerte, principalmente for di sector turistico, loke por genera as empleo despues den otro sectornan dependiente. Muy probablemente e crecemento di empleo (formal) lo keda mustra na un nivel mas lento, pa motibo cu tin un forza laboral considerable emplea oficialmente caba, cu ta na disponible caba pa e aumento di actividad economico.