Na januari Aruba lo ricibi e prome lote di alrededor di 100 vacuna cu Hulanda ta manda pa nos, pero tambe pa e otro islanan di Reino Hulandes. Asina Sharline Koolman di DVG a informa durante un conferencia di prensa di Crisis Team.
Segun Hulanda su plannan rond di 4 di januari proximo e prome vacunanan cu ta yega cerca nan. Si tur cos ta manera mester ta logisticamente, na Aruba nos por spera e vacuna entre e di dos of di tres siman di januari 2021 pa asina cuminsa cu e distribucion.
A base di e cantidad di vacuna cu Hulanda lo haya inicialmente, nan lo reparti esaki den porcentahe. Koolman a bisa cu nos no por spera cu di biaha nos ta bay haya pa henter e poblacion, ni pa e grupo di riesgo completo cu nan tin plania.
El a duna un up date di e vacuna y con leu nos ta di cuminsa aplica e vacuna den nos comunidad, prioritariamente riba e grupo considera di riesgo, entre nan persona cu ta traha den e sector di cuido, persona 60 plus y persona cu problema di salud.
Nan ta bezig cu e parti logistico cu ta inclui unda nan mester warda e vacunanan y tambe pa DVG tin tur cos na su luga na momento cu e freezer specifico lo yega pa nan lo tin un luga bon prepara pa nan. Unabes cu e parti aki ta cla esaki ta bira e luz berde pa e vacuna por wordo manda.
Koolman a bisa cu nan a yega di tene reunion intensivo dos pa tres biaha pa siman cu e cinco islanan di reino hunto cu Hulanda. Aworaki nan ta den e fase pa cumpra e material cu mester, specialmente e freezernan cu ta uno specifico pa mantene e vacuna aki. Hulanda den principio lo cumpra e freezernan aki pa manda nan pa e islanan di reino. Pa locual ta e material uza pa e parti logistico, esaki lo bira un regalo y tambe e vacunanan pa Aruba.
