Bastante confusion a surgi ultimamente cu e suspension di un funcionario na parlamento, pendiente investigacion. Esey riba su mes ta ‘standard procedure’ y e persona a haya un carta di e autoridad ministerial concerni, nos Promer Ministro, cu a informa su persona di tal decision. E asunto no a keda sin causa reaccion multiple, segun e banda politico cu ta apoya.
Oposicion no a keda sin mustra riba e carera, segun nan impecable di e persona, lantando e pregunta ta con por a yega na sospecha algo semehante di e persona aki. Mester bisa cu aki oposicion no a acerca e asunto di e banda corecto, pasobra bira obheto di investigacion no tin nada di haci cu trayectoria profesional, ni edad, ni genero. Na momento cu autoridadnan ta dicidi cu ta na nan pa tuma accion manera den e asunto aki, normalmente mester laga e autoridadnan haci nan trabao y actua despues cu ta raporta conclusion cu por saca di e investigacion. Esey no a sucede y nos por a tende mil y un palabra di apoyo na adres di e ambtenaar en cuestion, pero cu no ta al caso pasobra e proximo paso ta segun loke autoridadnan ta topa eventualmente den nan investigacion.
Awor, den e caso aki ta trata di un persona cu ta traha pa hopi aña caba estrechamente cu e parlamentarionan y su trabao ta encera cu e ta apoya nan den trabao cu informacion al caso. Y, manteniendo cierto discrecion cu e trabao di funcionario publico na e nivel aki ta requeri, por ta cu sa comparti un opinion – politico – cu cierto parlamentario(nan); esey ta keda entre nan. Sin embargo, den e caso aki e sospecha ta cu e persona a bay mas leu den esaki y lo a subi tereno netamente politico, manera e carta ta bisa: “lo a tuma accion politico”, cu por ta accion no permisible pa un empleado publico den su posicion. Nos no ta bisa cu esey ta e caso; esey e investigacion mester demostra, o desmenti. Un cos si: pa ordena uninvestigacion di e caracter aki e autoridadnan lo mester tin suficiente indicacion palpable pa subi e ruta disciplinario. Esey tambe mester resulta di e investigacion.
Curiosamente nos ta topa riba Facebook intercambio di opinion di e funcionario cu otronan riba topico cu segun nos opinion ta pertenece den parlamento. Ta trata por ehemplo di discusion tocante e ‘overbruggingstoelage’ unda ta duna opinion tocante utilidad di e toelage aki. Esey pa nos caba ta mustra ‘borderline’ pero mas grandi nos sorpresa ta cu e propio presidente di parlamento ta opina hunto cu e persona… Ta parce nos cu ni e persona, ni e presidente di parlamento tin un nocion anto ta unda por y unda no por hiba tal discusion. Nos no sa si esey a tuma lugar, pero ta parce nos cu, envez di contesta e persona riba red social, lo tabata mas apropia pa e presidente, hunto cu e griffier, esun cu ta supervisa e trabao di e persona, lo a yama e persona aden y lo a mustr’e riba e riesgonan di opina asunto di e indole aki den publicidad. Ora un presidente di parlamento mes ta baha na e nivel aki di opina publicamente, envez di tuma e medidanan interno pa preveni cu opinion ta tuma rumbo robez, ta habri porta pa loke a resulta awor. Y claro cu lo tin opinion cu ta bisa cu libertad di expresion ta bay promer cu tur cos, pero na ningun pais na mundo un empleado publico por eherce un libertad ilimita di opina. E ta keda un linea fini entre discrecion profesional y libertad di expresion.
Tocante e firmamento di e carta na e persona, nos no ta comprende tanto buya. Promer Ministro ta e mandatario cu mester a firma y esey el a haci. Claro cu tabatin un peticion, si tabatin un proceso debido, di banda di e entidad, di e ambtenaar superior, y cu conseho di DRH, pa procede pa e suspension. Si el a bay di otro manera, esey anto no ta corecto.
Otro aspecto di importancia den e asunto aki ta e keho di nos Promer Ministro tocante e relato di prensa cu el a laga publica, cu a aparece cu otro titulo den un medio di comunicacion. E mandatario no a aprecia cu e contenido a aparece di tal forma y ta haya cu ta falta di respet pa haci esaki. No cu nos ta defende e medio en cuestion, siendo uno di claro orientacion politico, pero en general un medio no tin ningun obligacion di publica ningun relato di ningun gobierno o ministerio. Otro cos ta si ta publica un supuesto opinion di gobierno o ministro, cu no ta cuadra cu loke nan relato ta bisa. Pa pone e cos bon cla: no ta permisible cambia o troce palabra di ningun persona. Esey lo ta mal periodismo y esun cu ta haya cu a perhudica su persona y ta haya e asunto di suficiente peso, por cana su caminda legal pa haya rectificacion.
Den e situacion actual e unico caminda corecto pa cana ta haci y conclui e investigacion ordena y, esey si, sea transparente cu comunidad cu e resultadonan. Di mes e persona tin un posicion demasiado sensitivo pa laga duda encuanto e hechonan encontra, y sigur si no a topa cu nada sancionable. Esey tambe ta integridad.
