Entrepeneur hoben tambe ta contribui pa trece mas bida na San Nicolas

Ayera atardi mandatario encarga cu infrastructura Otmar Oduber (POR) a yama un conferencia di prensa conhuntamente cu hoben entrepeneur Tristan Nedd y Fundacion Museo Arubano (FMA). Loke a yama e ocasion special aki ta cu e hoben entrepeneur pa fin di luna lo habri su cafe situa den Nicolaas Store. Alabes FMA ta anuncia cu pronto lo nan ta cabando e trabounan necesario pa move Community Museum pa e monumento restaura di Nicolaas Store.

Tur esaki e mandatario a expresa ta pa curasha personanan pa habri negoshinan den area di Promenade di San Nicolas, siguiendo e ehempel di sr. Nedd kende segun sr. Oduber ‘ta un inspiracion pa nos tur mirando cu e ta tumando stapnan pa cuminsa un negoshi den su mesun bario’. Den cuadro di promove San Nicolas como e ‘Cultural & Heritage destination’ di Aruba sr. Oduber a expresa cu ‘we still believing’.

Kinan e mandatario a referi n’e manera con pa basta tempo tabatin trabou tumando luga pa haci e vision aki un realidad. Sr. Oduber a reconoce cu aunke den wowo di pueblo e movecionnan lo a bin na un fin, esaki no ta e realidad. El a splica cu trabounan intensivo den man di cierto fundacionnan a sigui keto bay. Alabes a duna di conoce cu di parti di gabinete Wever-Croes tin un compromiso pa asina haci e proyecto cultural y tambe economico na San Nicolas un realidad conhuntamente cu su coleganan minister di turismo Dangui Oduber (MEP) minister di cultura Xiomara Ruiz-Maduro (MEP), kende no por a ta presente pa e conferencia pa via di otro compromisonan anterior.

Palabranan di gratitud a wordo expresa den direccion di director di FMA Anky Vrolijk y presidente di e mesun fundacion Dello Gomez. Un aplauso a wordo pidi pa sr. Nedd kende tabata ‘e persona adecua cu e amor y curason pa aspecto cultural y pa su districto’. Esaki despues cu FMA pa basta tempo tabata buscando un persona cu lo por habri un negoshi den nan edificio renoba.

Trayectorio
E mandatario kier a para keto na Nicolaas Store pa asina reconoce cu t’aki e desaroyo pa haci e proyecto aki un realidad a cuminsa. Y lentamente por ilustra cu e proceso cu e edificio aki a conoce, cuminsando cu construccion cu a tuma luga conhuntamente cu Monumentenfonds, ta mustra con henter e desaroyo di ideanan a haya forma den henter e ciudad di San Nicolas. Te na dia di awo cu e cafe tin meta pa habri pa 25 di januari.

Ademas den par di luna sra. Vrolijk a anuncia cu lo habri e di dos piso di edificio Nicolaas Store unda e Community Museum lo bay muda, pues sra. Vrolijk a invita pueblo henter pa bin bishita e Museum of Industry cu ya caba ta habri pa algun tempo y den un par di siman e cafe di sr. Nedd.

Cafe cu lo bay habri
Sr. Nedd a splica un poco riba e concepto cu lo bay habri cu ne durante e conferencia di prensa, cual ta encera cu lo enfoca riba cuminda saludabel. “Nos ta bay tin tanto paden disponibel pa e cafe como pafo. Tambe den e area di patras lo bay tin un chill out vibe pa hende disfruta di dje.” Den e parti patras di e edificio nos a tuma nota di un obra di arte di artista Osaira Muyale, kende ta conoci pa su obranan di arte plastico cu ta cada un diferente pero ta wordo uni por medio di e colo blauw peculiar cu e artista sa uza. Den e area patras tambe lo tin entretenimento live riba cierto anochinan, e hoben a splica.

Despues di a papia poco cu chef, nos a haya sa cu lo bay enfoca riba cuminda cu lo ta accesibel na tur tipo di dietanan. Esaki kiermen cu lo tin cumindanan specialmente traha pa personanan cu ta sufri di diabetes, presion y personanan cu estilo di bida alternativo manera veganonan y vegetarianonan. Pa sr. Nedd esaki ta e ‘selling point’ tambe. Aunke tin hopi negoshi den vecindario cu ta bende cuminda e ta haya cu por medio di ofrece cuminda saludabel no lo tin mester di competi directamente cu e otro negoshinan.

Inspiracion pa habri negoshi como hoben
Sr. Nedd, kende ta tambe videografo, a splica cu e orarionan di su cafe lo ta di 8 or di mainta te cu 11 or di anochi riba tur dia di siman. T’asina cu ya caba tin 3 persona trahando full time durante dia, mientras cu den shift di anochi ta laga e trabou pa 2 persona full time.

E hoben su motivacion y inspiracion ta e manera con su mesun tata a lanta un negoshi na San Nicolas y tambe diferente persona cu e tabata mira ta cuminsa nan negoshi den e ciudad. E mes a lanta den e ciudad. “Mi semper a haya inspiracion pa hendenan cu ta purba di haci algo na San Nicolas. Mi tambe kier a ta parti di esey pasobra asina nos ta yuda San Nicolas, cual mi ta haya un luga hopi bunita.”

Pa loke ta trata e parti financiero di habri e negoshi, e hoben a gradici Qredits pa nan sosten den e parti aki. “Nan a kere den mi vision y mi ta hopi gradici cu nan pa a financia e proyecto. Despues di a bin cerca nos kinan na Nicolaas Store nan a financia e proyecto casi completamente.”

E mandatario a expresa cu sr. Nedd ta duna un bon ehempel por medio di kere den su bario y su cultura. “Netamente esaki ta e plataforma cu gobierno kier crea. Dicon? Pasobra at the end tarea di gobierno no ta pa maneha negoshi si no pa crea plataforma pa hende por haya oportunidad.”

Na final di e conferencia e fundacion a firma un acuerdo cu sr. Nedd cua ta formalisa e presencia di e cafe den edificio di Nicolaas Store.

Proyecto di solar panel lo reinicia pronto
Dibiaha colega di prensa di Hits100 FM a probecha pa hala horea di minister riba e proyecto di solar panel den Promenade di San Nicolas cu a keda neglisha pa basta tempo. T’asina cu e mandatario a informa cu pa fin di luna of cuminsamento di februari e solar panels lo ta den funcion. “Nos a pone presion riba e compania cu a bay cu vakantie durante cambio di aña pasobra e proyecto aki a keda para pa casi un aña. Por lo tanto nan a compromete cu nan lo termina di ehecuta esaki.”

 

You May Also Like

paul croes.jpg

Destino politico di Paul Croes ainda ta un pregunta

Desde diabierna ultimo a cuminsa un avalancha di rumor riba e actual minister sin ...

Visa Colombia

Aruba no a clarifica si lo ricibi turistanan Colombiano cu solamente paspoort

E pueblo Colombiano ta masha entusiasma. Entrante 4 di december nan lo por biaha ...

Trahadonan Iowua refineria.JPG

Grupo di trahado di Valero lo traha pa compania estatal y no cu Citgo

E grupo trahado cu te hasta ultimo momento a traha cu Valero, prome cu ...

4 FEB, SH, Asbest (1).jpg

Kitamento di tubonan di asbest na Playa ta continua

 Trahadonan di Arubaanse Wegenbouw ta kitando tubonan di asbest entre otro den Schelpstraat pa ...

Parlamento1.jpg

Parlamento ta aproba ley di integridad di ministernan

Ayera pa casi 8’or anochi parlamento a aproba e Landsverordening houdende regels betreffende de ...

A2 aruba art fair (sh) (3).jpg

Aruba Art Fair: Bunita exposicion pero malcontento bou artista

E evento artistico grandi pa ilumina San Nicolas, esta Aruba Art Fair cu participacion ...