E agencianan di biahe a yega di confronta diferente golpi durante e ultimo aña. E ultimo aki conoci mundialmente como e crisis di coronavirus, ta haci cu eventualmente masha poco di nan lo por logra sobrevivi.

Director di Discovery Travel N.V., Robert (Bob) Spellen hunto cu su casa y man drechi, Mary Spellen ta haya cu e situacion actual ta haci cu nan ta entre e actividadnan comercial cu a sufri mas pa consecuencia di Covid-19. “Si no tin vuelo, nos no tin trabao. Nos entrada ta basa riba esey,” Bob a declara durante un entrevista cu Bon Dia Aruba.

Actualmente como agencia di biahe, nan no tin mucho cos cu nan por haci. Practicamente gewoon sinta warda te dia e lockdown ta wordo kita pa asina vuelonan cuminsa drenta y sali bay. Ademas cu e clima di biahamento por start bek y normalisa.

Bob y su casa Mary ta keda positivo y tambe realista. Y nan ta haya cu mirando e situacion, biahamento na inicio no ta bay ta comodo ainda. Y tambe ta depende cual destino nan ta bay. Pues nan ta kere cu e dia cu Discovery Travel habri bek, nan mester cuminsa busca unda ta e camindanan cu no tin Covid mas. Ya sea cu a wordo haya un remedi p’e, pa asina nan como agencia por recomenda nan clientenan. “Pero e no ta bay ta facil!” Bob a sigura.

E ta kere cu biahamento den crucero no ta bay ta di e facil ey mas pa bende. Mirando e hecho di experiencia cu hopi hende a pasa abordo di crucero, caminda nan a keda pega den dje. “Hopi hende lo pensa dos y tres biaha prome cu nan ta tuma un crucero,” segun Bob Spellen

Mary a bisa cu nan ta consciente cu unabes cu e lockdown ta wordo lanta, nan no ta bay cuminsa bek normal. Nan ta kere cu e crisis actual ta bay afecta nos pa dos aña. El a trece dilanti cu e industria di crucero te cu dia 31 di juli ta para. Nan a bisa cu por ta, despues di e fecha aki, nan ta evalua si nan ta extende un biaha mas. Igualmente el a laga sa cu nan clientenan cu tabatin plania pa bay cu vakantie, nan tur a yama pa cancela nan biahe. “Nan no ta bay mas!” el a bisa.

 

Golpi tras golpi.
Como agencia di biahe nan ta kere cu nan por aplica pa e ayudo cu gobierno ta ofreciendo pa asina sigura stabilidad di e trahadonan. Actualmente nan tin dos trahado, Marlene Harms y Estel Lauder-Galan. Sinembargo te ainda Bob no a haya sa si un agencia di biahe por cualifica pa solicita e ayudo aki tambe.

Bob y Mary Spellen ta haya cu esaki ta e sla mas duro cu nan a bin haya como agencia di biahe. Sinembargo nan a yega di sufri un serie di golpi. E prome ora cu e aerolineanan a kita e comision riba benta di ticket aereo entre 1994-96. Bob ta recorda cu e tempo aya un 60% di e agencianan di biahe a cera mundialmente.

E di dos golpi a bira e situacion cu a surgi cu e atentadonan terorista dia 11 di september di 2001 na Merca. Despues di e golpi aki no tabatin mucho agencia mas na Aruba, solamente cuater a logra sobrevivi. 29 aña pasa ora cu nan a habri, Aruba tabatin alrededor di 18 agencia di biahe.

Pero despues di e crisis cu nos ta pasando aden, e no sa cuanto lo keda pa sigui ofrece nan servicio. “Nos tur tin cu busca un otro forma kico pa bay haci y con pa sigui bay…,” segun Bob.

Pa Mary Spellen e crisis di coronavirus a bira un golpi duro pa e agencianan di biahe. “Nunca nos no a spera un cos asina. E otronan a pasa pa un tiki tempo, y e tabata mas tanto na Merca,” el a bisa. Pero e crisis di coronavirus ta full mundial.

E ta haya cu e hendenan cu ta bay biaha aworaki ta esunnan cu mester pa motibo di salud y trabao. Pero e ta kere cu pa biahe di placer no ta bay ta di e facil ey. Esaki evaluando e forma cu awor nos lo mester biaha. Ademas di e rekisitonan cu nan ta pidi y regulacionnan nobo di biahe. Entre otro nan lo exigi pa biaha cu mask. Pues e no lo ta confortabel pa realisa un vuelo largo cu mask bisti.

E cantidad di ora mas tempran exigi prome cu bo mester bay, mirando cu e proceso ta bay bira mas slow debi na e distancia social. Pero seguramente e ticket su prijs ta bay subi debi cu e avion no lo por bula cu full nan capacidad di pasahero. Sintetisando, e crisis di coronavirus a trece hopi complicacion cu ne, y e ta bay afecta industria di biahe en general.

Discovery Travel N.V. ta un compania serio cu ta existi for di 1991. Tanto Bob como Mary Spellen ta keda positivo y cu hopi expectativa riba kico e mundo di biahe lo trece cune. Mary a cera e entrevista aki bisando: “Esaki ta parti di e positivismo cu nos mester tin. E virus ta sigui y nos mester purba di wak’e cu algo miho lo por bin den mundo di biahamento.”

LEAVE A REPLY

Please enter your comment!
Please enter your name here