Segun varios usuario di Twitter, e programa cu tin mas di 30 temporada a predeci no solamente cu coronavirus (covid-19) lo yega mundo, pero tambe cu e maribomba asesino lo yega Merca.

“The Simpsons realmente a predeci 2020”, un tweet a bisa, cu un clip di e episodio di 1993, ‘Marge in Chains’, cual tabata episodio number 21 di e di cuatro temporada. E episodio aki a papia tocante un virus cu a yega di Osaka, Hapon, na Springfield, infectando cantidad di residente. Ademas di esey, un caha di abeha asesino ta libera, lesionando mas hende ainda.

Den e episodio, un trahado di e fabrica unda tin juice, ta tosa den un di e cahanan cu a yega na e ciudad unda famia Simpson ta biba, y esey ta causa un contagio masivo, incluyendo mayoria di protagonistanan. Mientras Marge ta purba di cuida tur hende, e ta wordo aresta pa accidentalmente horta algo di supermercado.

Riba e clip di 22 seconde – cu ya tin mas di 393mil likes – ta mira un protesta den cual ciudadanonan di Springfield ta exigi un cura pa e malesa. “Pero e unico cura cu mi por recomenda ta reposo. Cualkier otro cos cu mi duna boso, lo ta un placebo” a splica dokter Julius Hibbert na e multitud rabia.

Na e momento ey nan ta puntra e dokter con pa haya e placebo, y mirando un truck dilanti hospital, aunke no tabata sa kico tabata e contenido di e truck, e hendenan ta purba bolter esaki. Sinembargo, un di e cahanan ta kibra liberando e ‘maribomba asesino’.

Escritor di The Simpsons, Bill Oakley a retweet e video bisando: “Bon, mi ta supone cu si nos a hacie (predeci futuro).”

Despues, como contesta na e ‘confesion’ di Oakley, un usuario a señala e iresponsabilidad di ser humano na momento di lubida hechonan asina. “Y precisamente manera den The Simpsons, nos lo sigui dilanti unabes cu e episodio aki termina, nos no lo siña basicamente nada di esaki, y despues nos lo sigui pa haci algo ainda mas estupido”, na locual Oakley a contesta ‘exactamente’.

Luna di maart ultimo, tres potret di e episodio aki a bira viral despues cu a compara ‘e grip di Osaka’ cu e problematico termino di ‘virus Chines’, cual a wordo señala como racista. “Mi no gusta pa e wordo usa pa fin nefasto. E idea cu un hende ta apropia malo pa haci coronavirus parce un complot Asiatico ta teribel. Den termino di purba culpa Asia, mi ta kere esey ta vies. Mi ta kere e antecedente (di grip di Osaka) mas tabata e grip di Hong Kong na 1968. E intencion tabata un chansa rapido di con grip a yega aki”, Oakley a bisa The Hollywood Reporter na maart.