Durante e ultimo añanan, e comerciantenan den caya principal a resulta sistematicamente afecta pa falta di actividad den nan negoshi. Un di nan ta e comerciante Frank Tieleman.

Diferente esfuerso a wordo haci pa reactiva nan comercio y recobra e splendor di antes. Pero nan no a resulta nada facil ni efectivo den e area importante y bunita aki, situa den pleno curason di Oranjestad. Mas bien nan a bira remedinan paleativo cu ainda no ta alivia nan preocupacion.

Na momento cu e pandemia di coronavirus/Covid-19 a haci su presencia na Aruba, e virus aki a bira un golpi duro pa tur comerciante di nos isla. Pero e comerciantenan di caya principal cu ainda no a logra recupera di e situacion dificil cu nan ta pasando aden durante e ultimo añanan, a sufri un dobel golpi.

E medidanan efectivo introduci pa combati cu e virus por a plama masivamente riba nos isla, a haci cu e area aki a bira mas solitario cu nunca. Pero awor cu nos a drenta e fase 3 pa reactiva nos economia gradualmente, un biaha mas nos por mira cu establecimento comercial den caya principal ta habri bek cu un speransa nobo, entre nan pacus, barbershop y coffee. Pero apenas e proceso nobo aki ta cuminsa cu un dobel esfuerso pa nan: No solamente pa sigui atrae mas cliente potencial den caya. Sino cu e clientenan aki por haya e confiansa di sinti nan mes safe pa bay bishita nos caya principal.

 

Durante un entrevista cu Bon Dia Aruba, comerciante Frank Tieleman kende a yega di forma parti di directiva di e ex-asociacion di comerciantenan di caya grandi conoci como MAMBO, a bisa cu debi na e situacion dificil di e crisis di Covid, nan a bay na cero actividad economico.

E ta reconoce cu ta un golpi duro pa negoshinan den general na Aruba. Mayoria actividad comercial considera no esencial, mester a cera. Pero nan tabata medidanan di salubridad publico necesario. Di un banda –segun Tieleman– tur hende ta compronde e riesgonan di e Covid-19. Sinembargo no ta facil pa logra un balans entre e parti di salubridad y otro parti di actividad economico. No solo den caya principal, sino di tur sector di nos economia. E sectornan aki, cu ta e musculo di nos economia, no mester sinti nan mes asina preta cu no por habri mas. E ora ey nos ta confronta otro problema di un magnitud grandi tambe.

A pesar di e panorama aki, e comerciante Tieleman ta mantene su mes positivo. Te hasta e tin algun proyecto den mente cu lo kier bira realidad den futuro. E situacion cu nos ta confronta no ta uno facil, pero e tin speransa cu poco poco nos ta sali afo, y cu economia ta bay reactiva bek. Awor cu e fase 3 a drenta na vigor, Tieleman por wak cu e comerciantenan ta cuminsa habri bek y cu poco poco tin presencia di hendenan den caya principal. E por wak refleha esaki cerca su clientenan na Coffee Break, cu ta sinti e confiansa bek di disfruta di un koffie den caya. E dos prome cliente cu a bishita su negoshi tabata un pareha 60+ .

Durante e fase 2 manera otro tipo di negoshi, nan a cuminsa ofrece nan servicio cu cierto limitacion. Esta considerando e protocolnan cu a wordo introduci y reglanan di higiena y distanciamento social exigi pa DVG. Nan a cuminsa ofrece su koffie pa take out of nan cliente por consumi pafo den nan terasa. Pero awor cu fase 3 a cuminsa e siman aki, nan clientenan por sinta paden tambe, pero cumpliendo cu protocol. “E pueblo mester tin e confiansa cu e comercio ta duna nan parti di tene na mes na regla.”

Na final, Tieleman ta haya cu pueblo mester por cuminsa participa den economia local cu ta habriendo bek. Pasobra esaki ta e motibo cu a cuminsa habri gradualmente pa economia local cuminsa draai, ya cu actualmente Aruba ta safe contra e virus. Pero si e consumido no ta cumpra, basicamente nos ta den e mesun posicion.