E aña aki e pandemia di Covid-19 a ocasiona cu cantidad di festival prestigioso di musica cu ta wordo realisa anualmente den henter mundo a keda cancela, y Aruba Symphony Festival & Academy no a bira un excepcion.

Director artistico di e festival, Simon Gollo a anuncia oficialmente cu e di 6 version di e evento aki realisa na Cas di Cultura no lo tuma luga pa 2020. No tabata un decision facil pa tur hende envolvi den e proyecto aki, directiva, maestronan, studiantenan y instancianan cu a carga e bunita festival di musica clasico y contemporaneo durante un lustro.

Durante un entrevista cu Bon Dia Aruba, e violinista y director di orkesta Venezolano a bisa cu e pandemia di e Covid a bira un situacion inespera. El a afecta e continuidad di un proyecto cu ta wordo realisa cu hopi amor, esfuerso y un vision di desaroyo pa Aruba riba nivel musical.

E festival aki a crece durante e ultimo lustro. Un publico cu ta mustra nan entusiasmo pa acoge na Aruba un evento di e caracteristica di Aruba Symphony Festival & Academy. Un tipo di evento di e caliber aki –segun Gollo– ta invita nos balora loke esaki ta nifica pa un turismo di calidad y crecemento di calidad di bida di nos poblacion. E ta considera importante pa sigui traha den funcion di reconstrui e structura administrativo y organisatorio di e festival. Tambe nan mester evalua pa bin cu un oferta ‘digno di Aruba su beyesa musical.’ E ta haya cu esaki ta un gran reto despues di renace di e gran crisis aki.

“E tristesa ta inimaginabel. No nos por sconde e sentimento di encuentro di tanto musico cu e publico Arubiano. Cu e hendenan cu ta stima nos y cu nos ta stima nan na Aruba.” El a bisa cu practicamente e evento importante a bira un escenario ideal pa encuentro entre nan, semper cu un sonrisa y un speransa. “E festival a bira un gran fiesta di humanidad y alegria.”

E pandemia aki a ocasiona cu cantidad di encuentro y evento masivo riba diferente tereno a wordo cancela. E circunstancia di e pandemia a haci cu nan a wordo posponi. Logicamente el a expresa cu ta existi un reaccion di tristesa y nostalgia rond di e decision aki. Pero tambe di responsabilidad y respet. P’esey nan a dicidi di informa riba e decision aki na nan publico, studiantenan y maestronan pa no tuma niun riesgo cu lo por compromete nan salud y bienestar.

Sinembargo otro aña 2021 ta mustra uno prometedor y interesante riba organisacion di cantidad di evento cultural, dependiendo di e desaroyo di e pandemia. Aunke e aña aki e ta nostalgico di no por a organisa e festival y crea musica. Pero e ta sinti un gran emocion y expectativa di loke ta bin despues. “Imagina bo e prome concierto cu ta wordo organisa na Cas di Cultura.” E ta haya cu e situacion actual ta crea un espacio pa tur hende reflexiona riba importancia di un evento cultural, ya sea musica, teatro, etc.

No mester lubida cu e decision aki no ta uno isola, sino cu e ta inclui e medidanan cu diferente gobierno a bin cune pa protege nan poblacion, entre nan Aruba. “No por nenga cu e medidanan mester wordo respeta y siña di tur esaki pa bin cu cosnan miho pa futuro.”

 

Gollo a declara cu salud ta un prioridad di bida mas ariba hasta di e mesun musica cu den su caso ta hopi importante. E situacion aki ta permiti cada un di nos -segun e musico- pa tuma decisionnan mas sabi, responsabel, y hopi prudente riba e responsabilidad grandi di organisa eventonan masivo unda ta bin hendenan di diferente pais. E festival a bira un punto di encuentro na Aruba di hendenan cu ta bin for di Latino America, Centro America, Nort America, Europa, etc.

Experiencia di bida

 

El a conta su experiencia con e pandemia a afecta su actividad musical. Na inicio di aña e tabatin un serie di concierto programa na Vietnam. Nan a bira e prome compromisonan cu nan a cancela, considerando cu den e region Asiatico e virus aki a cuminsa plama.

“Mi no tabata compronde mucho cla e decision aki.” Gollo tabata entre e cantidad di hende cu no tabata consciente di e efectonan cu un pandemia tin pa humanidad… E gravedad y alcance di un pandemia. Logicamente tur hende sa e nificacion di e palabra aki, pero varios generacion no a yega di biba den nan propio cuero e realidad di un pandemia desde Griep Spaño.

E echo aki a pone e musico pensa riba e magnitud di loke tabata bin riba henter nos planeta. Despues un serie di concierto cu e tabatin programa a wordo cancela den henter mundo. E tabatin un agenda basta yen pa 2020. Apesar di e situacion aki y su efecto, Gollo ta balora e tempo aki como uno valioso. E por comparti mas cu su famia. Tambe e ta haya tempo pa lesa mas y studia mas. “Pero tambe pa bay den nos mes y no solamente biba pa traha.” E ta haya cu nos mester busca felicidad mas leu cu e bida profesional mes.

Apesar di e pandemia y su consecuencia, e ta haya cu e situacion aki a bira un oportunidad pa humanidad reflexiona y evalua tur cos cu mayor sabiduria pa nos futuro. Segun e musico, e pandemia aki a bira un enseñansa pa henter mundo.

Gollo a bisa cu despues di henter un enseñansa biba durante e pandemia aki ta surgi un pregunta: Con mi ta re inicia? E musico aki a bisa cu di su banda, e kier bolbe cu mas ekilibrio, teniendo cuenta cu tempo dedica na su famia y su bienestar, entre nan haci actividad fisico. Un proyecto cu Gollo por a bira realidad durante e pandemia tin di haci cu e prestigioso seyo Spaño IBS Classical. Nan mes a anuncia oficialmente cu e proyecto aki ta uno ambicioso. Ta trata di e lansamento di e mas recien album di e violinista y director di orkesta, Simon Gollo y pianista y compositor, John Novacek. “Percura cu nada di esakinan no lo wordo afecta pa e mesun exito profesional cu nos lo por conkista,” Simon Gollo a laga sa.