Susana Romero ta un facilitado of officer di Aruba Certification Program (ACP). Ya caba pa 9 aña e ta envolvi den e programa aki. E mesun aña cu ACP tin di existencia organisa pa Aruba Excellence Fundation.

E programa aki tin como meta pa tur persona cu ta labora directo of indirectamente den sector turismo por dispone di informacion corecto y conciso tocante diferente aspecto di Aruba. For di 2011 aña cu ACP a cuminsa te cu aworaki nan tin alrededor di 6870 persona certifica caba.

ACP y Covid

Un sector importante cu ta atendiendo e programa aki ta esun di HORECA cu a resulta seriamente afecta debi na e situacion di e pandemia di Covid-19 na Aruba y henter mundo. Sinembargo Susana ta mira cu satisfaccion cu a pesar di e reto aki, mas empresa y organisacion ta percura pa sigui e programa aki. Recientemente por ehempel cuater organisacion a logra certifica tur nan miembro di staf y asociado como Embahadornan di Aruba.

“Meymey di e pandemia practicamente tur cos a cambia,” el a bisa durante e entrevista aki. E tabatin un agenda hopi prometedor cu plannan grandi haci pa full e aña aki cu diferente hotel y diferente organisacion, pero e situacion di Covid, a haci cu nan mester innova.

Susana Romero a laga sa cu e team di ACP a opta pa realisa e programa online. Nan a prepara tur cos, specialmente a traha e material cu e puntonan mas cardinal pa asina aki brinda e participante informacion di calidad. E intencion ta cu e participantenan por haci uzo di e informacion aki facilmente den cualkier linea di trabao, sea cu e participante ta traha directo of indirectamente den turismo.

Nan a yega di agrega algun cosnan nobo. Debi cu nos ta den e pandemia normalmente nan ta haci un tour cu e participante na diferente luga, pero aworaki debi na e medidanan di DVG nan no por haci’e mas. Pero esaki no ta kita cu digitalmente nan por realisa un tour virtual 360 grado. Pa logra esaki nan a cera un colaboracion cu FUTURA Lab. Ta asina cu e participante ta bisti un Google virtual, caminda e por sinti cu e ta fisicamente den e sitio cu nan ta desea di bishita, pero virtualmente. Nan ta 21 luga bishitante di nos isla. E ta un programa piloto cu nan a realisa recientemente na Bucuti Hotel.

Programa

E programa mes ta contene informacion tocante nos prome habitantenan y tambe e herencia cultural cu nan a laga atras, y con esaki ta influencia nos. Tambe un aspecto importante tin di haci con comunidad di Aruba mes ta.

Nan ta uza e palabra Zjeito cu ta mas tanto un servicio online pa mas persona por siña tocante Aruba su naturalesa, historia, cultura, turismo, etc… “Pa bo por comprende e caracteristica Arubiano aki. E toke unico. E bishitante ta bisa cu Aruba tin un manera unico di brinda servicio…” Comprendiendo mas hende nos historia di Aruba, mas hende ta aprecia tambe e isla, Susana a laga sa.

Monique Zaandam ta un di e empleadonan di Bucuti hotel cu a participa den e programa aki. E ta haya cu e tabata hopi great. Na principio e tabata un poco nervioso, ya cu el a tuma luga via online, pero e facilitado a haci’e hopi anima y interactivo. El a haya e contenido hopi importante, ya cu nan tur a siña un tiki mas di e historia di Aruba. E flora y fauna di Aruba. “Semper tin cos cu bo por siña ainda,” Monique a bisa. El a agrega cu nan a siña hopi tambe con pa duna e servicio, y tambe pa refleha ariba nan mes como dunado di servicio.

Encuanto e situacion interno di Covid ta un topico cu e bishitantenan tambe kier haya mas, y nan tin derecho pa obtene e informacion aki. Susana a bisa cu tin diferente website oficial cu ta wordo facilita y cu nan por haya e informacion aki. Tambe e ta haya cu e persona na servicio di un organisacion tambe mester sa con pa trece e informacion aki dilanti. “Maske cu e noticia no ta suficiente alentador, pero pa no crea panico cerca e bishitantenan. Esey ta e punto mas importante,” el a bisa.

Programa online gratis

Un reto hunto cu esun di salubridad debi na e virus tin di haci cu e parti financiero. E hecho cu no tin mucho entrada debi na e situacion cu nos principal sector economico a cay considerablemente pa causa di e pandemia, Aruba Excellence Fundation a opta hasta pa pone e programa aki pa un temporada gratis online. E posibilidad aki lo ta asina te hasta fin di december 2020. Otro aña despues nan lo bay evalua con e programa aki ta bay sigui y cual ta e prijs cu lo wordo cobra, etc…

Susana Romero a bisa cu un sonrisa riba su cara cu apesar di e situacion di e Covid, e interes pa atende ACP ta bastante. Na april ora cu nan a cuminsa bek, nan a haya hopi registracion y hopi hende motiva cu a probecha cu por fin nan tin tempo pa realisa e programa aki. Esta cu nan tabata na cas cu nan famia, y no tabatin mucho cos di haci. Esaki tabata e temporada di shelter in place.

Pero unabes cu e hendenan a cuminsa reanuda nan trabao e registracion a cuminsa baha un poco. “Ta keda na e doño di trabao pa nan motiva y pa nan inverti un tiki di tempo y energia den algo positivo.” Susana ta haya cu esaki ta un forma pa e asociadonan di cada organisacion por eleva e calidad di servicio den nan establecimento y pa henter Aruba.

P’esey na final di e entrevista aki, Susana Romero a formula un cordial invitacion pa tur persona cu ta biba na Aruba, y cu ta stima Aruba y cu ta desea di sa mas di nos historia, cultura, desaroyo di turismo y con pa brinda servicio excelente cu Zjeito, nan por tuma contacto cu Aruba Excellence Fundation of via: www.acp.aw nan por registra gratis na e curso aki pa bo bira tambe un Embahador di Aruba.