(AP) – Coronel di ehercito retira Farrell Patrick a duna les di ciencia di computer na West Point durante aña 1970 y despues na dos universidad priva durante aña 1990, pues e no tabata hopi sorprendi pa e progreso cu tecnologia a haci durante e decadanan.
Sinembargo ora e homber di 91 aña a experiencia realidad virtual recientemente, e tabata impacta. Sitando den un sala di conferencia na john Knox Village, na un cas di cuido y comunidad di retiro, Patrick a sinta mientras su wowonan y su oidonan a experiencia con e ta sinti bula den un Navy fighter Jet.
“E ta bunita,” el a bisa prome cu e programa di VR a trece e jet dilanti pa aterisa na un cargador di aeronave. John Knox Village ta un di e 17 comunidadnan pa hende di edad mayor rond di e pais cu a participa den e estudio recien di Stanford University cu a haya cu un gran mayoria di 245 participante di entre 65 pa 103 aña di edad ta disfruta realidad virtual, of asina yama VR, mehorando ambos nan emocionnan y nan interaccion cu e empleadonan.
E estudio aki ta parti di un esfuerso mas grandi pa adapta VR pa asina esaki por tin beneficio riba e salud di personanan di edad mayor y nan bienestar emocional ademas di yuda disminui e impacto di demencia den algun di nan. Durante e testnan, e participantenan tabata kies for di experiencianan di 7 minuut manera bula for di avion cu parachute, drenta un tanki militar, mira presentacionnan musical, hunga cu cachonan of pushinan of bishita paisnan manera Paris of Egipto. E participantenan a bisti un headset cu ta duna nan un bista 360 y zonidonan, cual a haci sinti manera cu nan a drenta e experiencia di berdad.
Stanford su estudio, trahando cu e compania Mynd Immersive a haya cu casi 80 porciento di e participantenan tabatin un actitud mas positivo despues di nan sesion cu VR y casi 60 porciento a bisa cu nan a sinti menos socialmente isola. E experiencia tabata menos bon pa e personanan kende su vision y oido a deteriora. Esunnan cu a haya e experiencia menos bon tambe tabata personanan cu no ta gusta tecnologia en general. Ademas, casi 75 porciento di e dunadornan di cuido a bisa cu e residentenan su estado di animo despues di usa VR a mehora. Mas di 80 porciento di e residentenan y casi 95 porciento di e dunadornan di cuido a bisa cu nan relacion a mehora cu otro despues di e experiencia cu VR.
“Nos ta comprobando cu VR ta un herment cu berdaderamente ta yuda cu e bienestar di nos grandinan,” Chris Brickler, Mybnd su CEO y Co-fundador a bisa. E compania basa na Texas ta un di e poconan cu ta specialisa den realidad virtual pa personanan di edad mayor.
