MEP tin un lista sin Minister Demisionario Chris Romero, y pa lider di e partido, e motibo tabata simplemente cu tabatin hopi hende capacita interesa pa subi e lista. Evelyn Wever Croes a bisa cu asina mes e ta agradecido pa tur cu no ta riba e lista mas, pasobra nan a yuda MEP pa hopi tempo y ta convenci cu nan ta sigui sostene e partido.
Evelyn Wever Croes tabata acompaña pa Presidente di MEP, Hendrik Tevreden pa entrega e lista di MEP na Conseho Electoral. Hunto cu nan tabatin un cantidad di sostenedor, cu segun Wever Croes a tene cuenta cu e reglanan di DVG.
Trahamento di lista semper ta algo serio y mester a tuma tempo a pesar cu Gobierno a cay di forma inespera, den concepto di Wever Croes. El a referi na Chris Romero bisando cu berdad tabatin desacuerdo cu number. Pero den su concepto, e percepcion ta cu number ta mas importante cu voto. Pa Wever Croes, tur hende riba e lista ta importante. “Ami no ta wak e prome 10 candidato so. Tur mester por representa Aruba bon. Ta hende cu mester por hiba debate.”
El a gradici di por a lidera e pais pa tres aña y mey y a pidi sosten di pueblo pa un biaha mas sigui dirigi Aruba. “A haya situacion financiero hopi malo, a haya crisis social, a pone 36 miyon posibel cu 33 proyecto den ehecucion y cu e pandemia, Y esey nos a atende na forma hopi responsabel, introduciendo FASE, y loonsubsidie. Nos por goberna den bon tempo y mal tempo.”
Lider di MEP a reitera su deseo pa haya mandato. Pero si mester, e ta dispuesto pa sigui traha den coalicion. “E unico cu MEP lo no traha cune ta cu AVP cu ta un universidad di corupcion.”
Ora cu a puntr’e di RED y e acusacion di RED cu MEP ta traiciona e miembro di coalicion, Evelyn Wever Croes a mustra sorprendi. Den su concepto, tur e partidonan den coalicion a drenta Gobierno cu un soño y tur a keda afecta pa desaroyonan. Tampoco e kier a reaccion riba e acusacion di lider di RED cu MEP lo a haci corupcion. “Mi no ta bay reaccion riba RED, sino enfoca riba problemanan di Aruba. Nos ta para contra corupcion.”
Pa loke ta e sistema electronico cu kier introduci pa sostene votacion, Evelyn Wever Croes den su calidad como Minister pa Asuntonan General a bisa cu dr. Glenn Thode di Conseho Electoral a duna un bon splicacion, pero si e ta ripara cu cos no ta bay bon den e proceso, e lo por actua “Pero na e momentonan aki, indicacionnan ta mustra cu Sr. Thode ta duna un bon splicacion. Ta den nan man e ta.
Mester bisa si cu lider di MEP a scoge pa entrega e lista personalmente, y no pa medio virtual manera Registro Civil y Censo a sugeri pa evita aglomeracion.
