Angelaine Fingal ta un hobencita di apenas seis aña di edad cu e aña aki lamentablemente a wordo diagnostica cu cancer di sanger, leukemia. Durante un conferencia di prensa, tata di Angelaine, Siegfried Fingal ta conta un poco mas di con nan a haya sa cu Angelaine tin e enfermedad aki y con ta bayendo cu Angelaine.

Alabes Geroge Winterdaal di GLW Foundation a anuncia un evento di recaudacion di fondo cu lo tin pronto pa yuda Aneglaine y famia den su lucha contra cancer.

Tata di Angelaine ta conta cu den su caso el a bira malo na cuminsamento di december. Nan a hiba Angelaine dokter, na unda nan a haci tur e testnan cu por a haci aki y nan no por a haya nada. Dokter di cas a bisa e famia cu nan por bay cas y pasa e dianan di Pasco trankil sabiendo cu tur cos ta bon.

Den luna di januari, dia 26 of 27, e tata ta conta, Angelaine a cay na scol y ora el a busk’e na scol, e no a wak nada y Angelaine no a bisa nada. Pero ora el a yega cas atardi, nan por a ripara e rascanan cu el a cay y diripiente el a bay den e mesun fase cu el a bay aden na cuminsamento di december.

Na e momento ey e mayornan a hib’e eerste hulp y dokternan a interna Angelaine pa observacion y nan a manda su sanger pa Utrecht na Hulanda pa test. Angelaine a haci aña dia 31 y dia dos nan a haya e noticia cu e ta leukemia y siguiente dia e tabata den avion rumbo pa Utrecht pa ricibi su tratamento na Prinses Maxima Centrum. Actualmente e ta bayendo pa cinco luna caba cu e ta na Utrecht.

“Tur dia nos ta riba algo nobo”, Sr. Fingal a bisa. El a conta cu informacion a sali cu Angelaine a wordo acepta pa participa den estudio na Utrecht. E seleccion ta bay via lot y tin algun rekisito. Den caso di Angelaine e ta e nivel mas abao y p’esey mes e ta cay den e categoria pa participa den e estudio.

“Mañan ta un otro dia atrobe cu nan tin cu saca sanger, prik e y e prik ta bay via su lomba, kiermen nan ta pone drumi cu tur esey. Cada dia ta un otro fase, un otro cos. Awe tabata un dia contento, mi a papia cune mas trempan y e ta alegre. Pero e ta fastioso pasobra tur dia ta algo y te aworaki nos no a yega e final. Falta basta pa bay y mi ta spera nos por yega na un final contento, pasobra bo ta scucha storianan positivo y di otro banda bo ta haya storianan no mucho alentador”, el a expresa.

A pesar cu tata di Angelaine ta remarca cu nan fe cu tur cos lo sali bon ta grandi, tin desafionan ta bin di tur caminda, personal y financiero. “Ami ta ‘kinan, e mama y ruman tambe ta aya y di un dia pa otro bida ta cambia. E ta fastioso y nada facil”, el a agrega.

Fingal ta conta cu Angelaine ta respondiendo bon na e tratamento. El a splica cu e ta haya diferente tratamento di kimoterapia. Tin biaha e ta hay’e via boca cu ta djis un pildo y otro biaha e ta haya inyeccion via un aparato cu ta den su curpa caba y di eynan tin dia e ta djis keda conecta, e nurse ta bin y ta inyect’e ora e ta drumi y e no ta sintie.

Pero otro tratamento di kimoterapia, cu ta mas duro, cu e ta hayando un biaha pa siman, eseynan si e ta si e ta sinti efecto manera problema di bay af, hopi dolor y sacamento.

Pa loke ta e tema di cabey, Angelaine su cabeynan a cay caba y esey tambe tabata un proceso pa prepara e mucha. “Di cuminsamento caba, prome cu el a bay caba mi a bis’e cu su cabey ta bay cay y el a bay den shock. Pero mi a bis’e pa no worry pasobra e ta crece back. Nos mester prepar’e pa cada stap”, Sr. Fingal a conta.

Fingal ta remarca cu e no tin niun problema pa loke ta AZV y nan ta cubri tur cos. Di experiencia, cu otro familiarnan cu tambe a pasa den dje, el a comenta, nan a pasa den duro. Pero di su experiencia cu Angelaine su caso, e ta enfatisa cu e no tin nada di keha di banda di AZV. “Manera mi ta bisa hopi hende, e la wordo trata manera un prinses”, el a indica.

Fingal a enfatisa cu den nan caso, e mama di Angelaine a subi avion sin pensa dos biaha pa bay compaña su yiu, lagando trabao y tur cos atras. El a expresa cu e tambe ta desea di t’ey aya cu su famia, pero pa motibo di cierto factornan e mester ta aki na Aruba.

“Ami tambe lo kier ta eynan pa bisa bo berdad, pero mi ta ‘kinan pa cierto factornan. Na final di dia mi no kier ta ‘kinan, mi kier ta aya bao. Pero ya bo tin cu sigui riba dje, bo tin cu keda traha pasobra tin cos di paga, tin cosnan pa haci y niun hende ta yuda bo den esey”, el a expresa.

Sr. George Winterdaal di GLW Foundation a anuncia cu lo tin un evento di recaudacion di fondo pa asina yuda Angelaine y su famia den nan lucha contra leukemia.

Durante di e ultimo añanan, GLW Foundation a yuda diferente famia, diferente instancia, vooral muchanan y mas o menos 75 mil florin ya caba e fundacion a duna. Y e biaha aki e fundacion ta trahando duro pa yuda Angelaine y su famia.

“Nos ta haci yamado na comunidad di Aruba pa coopera cu nos manera semper boso a haci, dianan dos y tres di juli. Dia dos di juli lo tin colecta den box rond di Aruba y dia tres lo tin colecta tambe rond di Aruba y lo wordo combina cu un evento di koffiemorgen na Centro di Bario Playa Pabou, cu lo ta cuminsando for di 10or di mainta na unda comunidad por aporta na e causa”, Winterdaal a bisa.

 

LEAVE A REPLY

Please enter your comment!
Please enter your name here