Minister Otmar Oduber (POR) di medio ambiente a indica cu lo mester mira den Parlamento, pa loke ta trata e ley di Serlimar, con ta bay anda cu e suma cu ta cobra fundacionnan y asociacionnan pa maneha desperdicio. Ademas den un proceso mas largo lo por determina si ta laga e companianan cu ta produci mas sushi contribui mas.

Reflehando un di e criticanan di Raad van Advies riba e proyecto di ley di Serlimar, Bon Dia Aruba a puntra minister encarga cu Serlimar dicon no a opta pa bay den direccion di laga companianan cu ta susha mas paga mas pa maneho di desperdicio. E minister a indica cu esey lo ta un direccion den cual lo por bay, manera cu Hulanda ta haci esaki, pero cu esey ta un proceso mas complica y cu por bay den dje den un di dos fase.

“Pero nos a kere na e momento aki tabata mas husto pa laga tur hende contribui. Mi ta contento cu e reaccion cu tin te awo, mirando cu e recibonan a sali fin di juli.”

Pa loke ta trata fundacionnan y asociacionnan, Raad van Advies a indica cu no tabata cla cuanto e entidadnan aki y otro entidadnan legal cu no ta compania lo mester paga bou e ley actual. E mandatario a indica cu ‘esey ta un debate cu nan mester tin den Parlamento riba dje’. “E ta bay pa produci sushi y kico bo ta haci cu e sushi. Un fundacion ta paga huur y ta paga awa, coriente, utilidad. No ta exoner’e a a base cu e ta un fundacion. E pregunta ta — y esey ta e discusion cu mester bin den parlamento — si bo tin cu exonera un hende cu ta produci sushi pa paga pa e sushi?”.

E mandatario ta kere cu e unico exoneracion cu por tin pa no paga pa servicio di Serlimar lo mester existi exclusivamente pa pensionadonan cu ta ricibi pensioen como unico entrada bou e maximo di AOV y pa e personanan cu ta biba unicamente di bijstand. Esaki ta loke tin den e concepto di ley cu a entrega na Raad van Advies tambe.

 

LEAVE A REPLY

Please enter your comment!
Please enter your name here