Ayera den oranan di atardi cu gritonan y t-shirtnan cu e slogan ‘No hunga cu nos pan’ e trahadonan di e compania MetaCorp a haci un concentracion dilanti di edificio di Parlamento pa demostra nan preocupacion tocante e anuncio cu gobierno a haci dianan pasa, di loke ta trata un cambio di ley di Serlimar y e introduccion di un ley di Sugar Tax, cu te ainda no ta precisa.

Den e manifiesto cu Julio Wever, representante di e trahadonan di MetaCorp a lesa pa e Presidente di Parlamento, Ady Thijsen, nan a splica cu Gobierno pa algun tempo caba di forma sistematico y strategico ta haci tur sorto di maniobra pa stroba progreso di nan compania.

Durante e lectura, Wever a bisa cu nan no ta tuma nan na cuenta na momento di tuma decisionnan cu ta afecta nan directamente; y gobierno ta purbando pa competi cu sector priva, haciendo uzo di leynan pa faborece sector publico, pero den desbentaha di competencia di sector priva.

Tocante e compania Ecotech, nan a expresa cu e compania ta existi prome cu Serlimar desde aña 1985 y nan ta e pioneronan den reciclahe na Aruba. Despues di 34 aña, awor gobierno kier pasa un ley cu lo afecta e mas di 6.000 cliente residencial cu Ecotech tin.

Pa loke ta trata Ecogas, gobierno ta preparando un cambio di ley pa obliga tur compania cu ta recoge sushi na servicio residencial of comercial pa entrega tur esey na planta di Serlimar. Asina mes ta pensando riba un maneho di un insinerado, cu tin un costo di riba 5 miyon florin cu lo aumenta e costo pa Aruba, cu den e momentonan aki finansa publico no por carga mas peso.

Cu e ley nobo, Wever a informa cu e derecho di existencia di e compania ta na peliger, segun el a bisa, minister a informa cu ta 13 trahado so lo ta e personanan afecta, pero esey no ta berdad.

Referiendo na e compania Tropical Bottling, cu por ta afecta cu e introduccion di ley di Sugar Tax, esey ta nifica un aumento grandi di e prijsnan di refresco, pensando cu pa via di Sugar Tax por reduci e consumo di refresco na Aruba. Di mesun manera el a señala cu nan no ta contra di e ley di Sugar Tax, sino e forma con kier implementa esaki, cu ta hopi discriminatorio, cu e consecuencia cu e unico planta di refresco di e pais lo bay haya retonan inevitabel pa su existencia.

‘Pan di cada dia ta sagrado pa e clase trahado’
Unabes cu Presidente di Parlamento, Ady Thijsen a ricibi e manifiesto for di man di Julio Wever kende ta traha den EcoTech, el a dirigi su mes na e trahadonan di Meta Corp. El a bisa cu ta ricibi e grupo di trahadonan aki cu hopi respet.

El a agrega cu e ‘pan di cada dia ta sagrado pa e clase trahado’, haciendo uzo di e leyenda poni riba e t-shirt di e manifestantenan aki. El expresa su comprension y te hasta su solidaridad na e trahadonan di Meta Corp. “Hopi hende ta lubida cu pa un pais bay dilanti, e mester di e clase trahado,” el a bisa.

Thijsen a declara cu Parlamento ta respeta tur firma poni riba e manifiesto entrega cu ta alrededor di 600, y el a priminti cu Parlamento lo bay traha cu prioridad riba e contenido di e manifiesto. Y el a priminti tambe cu e bos di e trahadonan aki lo wordo scucha, y tambe a conseha nan pa sigui e desaroyo di cerca, ya cu nan ta punto importante den e comunidad cu nos ta aden.

 

1 COMMENT

LEAVE A REPLY

Please enter your comment!
Please enter your name here