Contra Presidente Donald Trump su prohibicion, ex embahadora Mericano pa Ucrania Marie Yovanovitch a bisa investigadonan den Cas di Representante su proceso di impeachment cu Trump mes a pone presion riba Departamento di Estado pa kit’e di su puesto y sak’e di e pais.
Yovanovitch a bisa legisladonan cu ta investigando Trump su envolvimento cu Ucrania cu tabatin un ‘campaña coordina’ contra su persona basa riba ‘declaracionnan falso y sin merito di personanan cu motibonan claramente cuestionabel’. Cas Blanco a manda busca e embahadora pa asina e bolbe Merca y bandona su puesto na Kyiv. Esaki basa riba Rudy Giuliani su insistencia pa laga autoridadnan Ucraniano investiga acusacionnan infunda contra Democrata Joe Biden y su yiu Hunter, kende tabata envolvi cu un compania di gas natural na e pais.
Yovanovitch a duna su declaracionnan tras porta cera ayera, diabierna, parti di Cas di Representante su investigacion di impeachment contra Presidente Donald Trump.
Trump, den un yamada telefonico cu a tuma luga riba 25 di juli, a bisa presidente di Ucrania Volodymyr Zelenskiy cu Yovanovitch tabata ‘bad news’, segun un transcripcion parcial publica pa Cas Blanco. Ni Giuliani, ni Trump a publicamente adresa nan obhecionnan contra e embahadora.
Yovanovitch a bisa den su declaracionnan ayera cu nan a bis’e diripiente cu e mester bandona Ucrania ‘riba e proximo avion’. El a bandona su puesto den mei y djey a haya tende cu e presidente a perde confiansa den dje y cu e tabata poniendo presion riba oficialnan di State Department pa varios luna pa kit’e di su puesto.
Democratanan cu ta liderando e investigacion a bisa cu nan a dagvaard (subpoena, den terminologia Mericano) Yovanovitch diabierna mainta despues cu nan a descubri diahuebs anochi cu Departamento di Estado a prohibi su persona di aparece. Trump a prohibi tur empleado di gobierno pa coopera cu e investigacion.
