ALPHONSE ISLAND, Seychelles (AP) — Un mision cientifico lidera pa Reino Uni pa documenta cambionan tumando luga bou Oceano Indico a transmiti en bibo, video di calidad di television, pa prome biaha for di un submarino di dos persona.
Tormenta di monson y coriente fuerte bou awa a continua un reto na profundidad grandi, mientras trabou cientifico a cuminsa ayera na Seychelles.
AP exitosamente a logra transmiti e prome señal en bibo di varios camara den calidad completo for di un submarino uzando tecnica di transmision di video optico, den cual e imagen ta transmiti a traves di e olanan uzando e region blauw di e spectro electromagnetico.
Anteriormente, transmision di video en bibo for di e oceannan profundo tabata transmisionnan manda pa vehiculonan sin tripulacion opera remotamente, cu e video moviendo a traves di cabel di fiberoptic. E transmision a yega for di 60m di profundidad.
E cientificonan Britanico di e team di investigacion Nekton Mission tin como meta pa descubri e secretonan di e Oceano Indico, un di e luganan menos explora den mundo.
E ekipo multinacional ta colectando data pa yuda legisladonan prepara medidanan di proteccion y conservacion.
Director di Nekton mission, Oliver Steeds, a bisa cu e experiencia luchando contra e olanan ta subraya e necesidad pa expande conocemento cientifico di e awanan rond di e nacion isla, cual e ekipo t’ey pa haci.
“E problema ta, cu e luga aki, ora ta trata di coriente, e ultimo data di coriente cu a ser colecta prome cu nos a bin tabata na 1882”, el a bisa. “Ta parti di e reto. Esaki ta exploracion.”
Un dia di celebracion a caba trempan ora un accidente a kibra un waya di un piesa clave di ekipo, lagando esaki riba vloer di lama cerca di e isla chikito di Alphonse. No tabata conoci kico a kibra e waya di e ROV (Remotely Operated Vehicle). E ROV cu su camara ta un herment vital pa haya imagen cu por bay mas profundo cu e submarinonan.
No tabata conoci ki impacto e accidente lo tin riba e trabou di e team. E dos submarino lo realisa un operacion di recuperacion awe.
E expedicion di shete siman lo dura te dia 19 di april proximo.
