ORANJSTAD – Dialuna ultimo IPA a firma un MoU nobo cu NYU Steinhardt pa un periodo di cuater aña, esaki sigur tabata un dia importante pa e scol.
Entre IPA y NYU Steinhardt ya pa un temporada largo tin colaboracion. E instituto aki a ricibi durante e ultimo 8 añanan studiante di tercer aña di IPA den cuadro di nan pasantia internacional.
Awo cu e MoU nobo a bin un ampliacion grandi cu no solamente lo beneficia e studiantenan di IPA pero lo beneficia henter ramo di enseñansa pa motibo di mas colaboracion. E areanan cu IPA y NYU Steinhardt lo colabora ariba ta: investigacion riba tereno di educacion ambiental, training y cursonan di recapacitacion pa maestronan na Aruba riba tereno di liderazgo y STEM (materianan di Ciencia, Tecnologia, Ingenieria y Matematica) y desaroyo di plataforma sostenibel pa percura cu tin un bon hancramento di e conocemento den curiculo y educacion en general.
IPA ta hopi agradecido na NYU Steinhardt pa e bon cooperacion y confiansa cu NYU Steinhardt a brinda nos durante e ultimo 8 añanan y nos ta sumamente entusiasma pa sigui cu e ampliacion di e colaboracion aki. Un palabra di danki ta bay pa e personanan di contacto cu a haci esaki posibel, dr. Mary Leou, director di Wallerstein Collaborative for Urban Environmental Educationdi NYU, dr Erich Dietrich, Associate Dean for Global Affairs NYU Steinhardt y dr Paula Kibbelaar, investigado/ docente y International Officer di IPA.
Tambe un danki grandi pa e sosten ricibi di Gobierno di Aruba specialmente pa e Minister Plenipotenciario anterior Andy Lee y Minister Plenipotenciario actual Joselin Croes cu a hunga un rol importante den colaboracion aki. Tambe IPA ta gradici minister president Evelyn Wever-Croes pa su gran aportacion pa yuda realisa e MoU.
