Ayera durante e debate relaciona cu e situacion di e proyecto Green Corridor, ex minister di Infrastructura y actual parlamentario, Benny Sevinger (AVP) a defende  e proyecto aki y e team di tecnico y profesional cu a forma parti di dje.

Sinembargo un expresion cu e fraccion MEP a yega di cuestiona y referi na dje varios biaha, tabata ora cu parlamentario Sevinger a bisa: “Bo por para eynan. Critica minister Sevinger, señor presidente, mi lomba ta hancho. I don’t give a damn.” E expresion aki a produci un boroto, te hasta cerca e publico sinta den e tribuna a reacciona.

Parlamentario Sevinger a declara cu e elogio cu e ta haya di pueblo riba e proyecto aki ta grandi debi entre otro na e siguridad y spaarmento di tempo pa esunnan cu ta haci uzo di dje. “Esaki ta e realidad.” E ta bisa cu durante e intervencion cu minister actual di Infrastructura Otmar Oduber a haci riba e proyecto aki, un conclusion cu e por saca for di dje ta cu nos expertonan ta wordo bagatelisa y e ta lamenta esaki.

Tambe el a bisa cu Green Corridor no ta un proyecto di awe, sino cu e ta uno proyecto cu ta data fei mas cu 25 aña pasa. Ora cu nan a bin tuma e proyecto aki over na 2010, e gobierno anterior a pidi Hulanda pa tira un bista riba proyecto aki pa minimalisa e daño na naturalesa. Ademas a pidi nan ayudo den e trayecto pa nan por encamina y concretisa e proyecto aki.

El a bisa cu tin tres parti den e contractnan pa realisa e proyecto aki. Un tin di haber cu e banconan cu a fia e compania Odinsa CIC e placa pa realisa e proyecto aki. E contratista Odinsa y land Aruba cu ta esun cu ta bay huur e proyecto aki pa 18 aña. El a indica cu den e contract tin responsabilidad pa tur parti y den negociacion nan a yega na un compromiso entre tur e partinan aki. E compromiso tabatin di haber di pone un compania independiente pa supervisa e trabounan durante e realisacion di e proyecto aki.

Nan a logra un compania pa haci inspeccion pa e tres partnernan pa controla e calidad di e trabou. El a bisa tambe cu tabatin un team pa realisa e trabou di supervision aki. Mientras e tabata den e posicion di  minister cu ta esun responsabel di e proyecto aki, e tabata formula su pregunta na e team aki. E ta argumenta cu si no tin un carta di dje den henter e proyecto aki ta berdad. “Minister Sevinger no ta un minister cu ta sinta manda carta.”  Pero si tur siman nan tabatin reunion entre  su persona como minister cu e comision y team di PPP. Pues el a bisa cu nunca tabatin un reunion entre su persona cu banconan, ni tampoco cu contratista. “Esaki ta e realidad y transparencia cu a wordo caracterisa den henter e proyecto aki”, segun e parlamentario. E ta haya cu di un banda ta wordo bisa cu no tabatin control, pero na e otro banda tin 500 punto ariba mesa pa wordo atendi.

Debate
E fraccionnan di partidonan den gobierno a cuestiona cu tabatin negligencia den e proyecto aki considerando e 500 punto di remarca di un instancia profesional independiente ta indicacion aki. Parlamentario Marisol Lopez-Tromp (POR) a puntra kico e mancamento aki lo nifica pa e proyecto mes. Tambe con lo para cu e proyecto Watty Vos Boulevard, si esaki lo ta den mesun situacion.

Pero igualmente el a bisa cu tin mas proyecto manera HOH y aeropuerto, caminda el a pidi minister di Infrastructura Otmar Oduber  pa  mira e desaroyo di e proyectonan aki. Tambe nan kier mira mas informacion riba e proyectonan aki, prome cu nan ta aproba algo. Parlamentario Ricardo Croes (RED) a reacciona riba e proyecto aki cu a cuestiona di falta di transparencia y integridad.

Parlamentario Alan Howell (POR) a bisa cu e proyecto aki ta ‘otro golpi di e gobierno anterior.’ Esaki mirando un  rapport 15 januari 2018 cu cantidad di 500 fayo riba e proyecto Green Corridor cu e ta considera un berguensa nacional. Segun e parlamentario aki e topico di e debate aki no ta e bunitesa y beneficio di e proyecto, sino e problema financiero cu e proyecto ta actualmente y e  compromiso cu e prestamista pa logra fecha di disponibilidad. Tanten e proyecto no ta wordo entrega oficialmente.

E fraccionnan a pidi pa ex mandatario responsabilisa su mes di e forma con e  proyecto a wordo ehecuta.