Awe Facebook a anuncia cu a blokea Australianonan di mira y comparti noticia riba e plataforma, pa motibo di propuestanan di ley na e pais pa forsa gigantenan digital paga pa periodismo.
Editornan Australiano por continua publicando contenido noticioso riba Facebook, pero link y post no por ser mira of comparti pa audiencianan Australiano, e compania basa na Merca a bisa den un declaracion.
Usuarionan Australiano no por comparti noticia Australiano of internacional. Usuarionan internacional pafo di Australia tampoco por comparti noticia Australiano.
“E ley proponi fundamentalmente no ta compronde e relacion entre nos plataforma y editornan cu ta us’e pa comparti contenido di noticia”, regional managing director di Facebook, William Easton a bisa. “A laga nos enfrentando un escogencia dificil: purba di cumpli cu un ley cu ta ignora e realidad di e relacion aki, of stop di permiti contenido noticiero riba nos servicio na Australia. Cu un curason pisa, nos ta scogiendo e ultimo”, Easton a agrega.
E anuncio ta yega un dia despues cu Tesorero Josh Frydenberg a describi como ‘hopi prometedor’ e negociacion entre Facebook y Google cu companianan noticiero Australiano. Frydenberg a bisa cu despues di negociacion den weekend cu CEO Mark Zuckerberg di Facebook y CEO Sundar Pichai di Alphabet Inc. y su subsidiario Google, e tabata convenci cu e plataformanan ‘si kier drenta den e acuerdonan comercial aki’.
Pero minister di comunicacion, Paul Fletcher a bisa cu gobierno no lo hala atras den su agenda legislativo. “E anuncio aki di Facebook, si nan mantene e posicion aki, claro lo trece den duda e credibilidad di e plataforma den termino di e noticia riba dje”, Fletcher a bisa ABC. “Efectivamente Facebook ta bisando Australianonan cu e informacion cu bo ta mira riba nos plataforma no ta bin di organisacionnan cu tin politicanan editorial ni proceso di fact-checking ni periodistanan paga pa haci nan trabao”, Fletcher a agrega.
Parlamento Australiano ta debatiendo e propuesta di ley cu lo forsa e dos plataforma pa cera acuerdo cu noticieronan Australiano.
Senado lo considera e propuestanan di ley despues cu esakinan a pasa den Camara di Representante ayera.
Ambos plataforma a condena e propuestanan di ley como imposibel pa traha cune. Google tambe a menasa di elimina su motor di buskeda for di e pais. Pero Google ta cerando acuerdonan paga cu companianan noticiero Australiano bao su propio modelo News Showcase.
Seven West Media dialuna a converti den e negoshi di noticia Australiano di mas grandi pa cera un acuerdo cu Google pa paga pa periodismo.
News Corp. di Rupert Murdoch tambe a anuncia un acuerdo. Su rival Nine Entertainment segun reportenan ta cerca di su propio pacto, y ABC ta den negociacion.
Noticia ta hunga un rol mas grandi den modelo di negoshi di Google cu esun di Facebook.
Easton a bisa cu e publico lo puntra pakico e plataformanan tabata respondiendo diferente na e propuesta di ley cu lo crea un panel di arbitrahe pa pone un prijs pa noticia den casonan unda e plataforma y negoshi di noticia no yega na acuerdo. “E respuesta ta pasobra nos plataformanan tin un relacion fundamentalmente diferente cu noticia”, Easton a bisa.
